Jańa Konstıtýtsııany qoldamaıtyn oppozıtsııaǵa qoǵam tarapynan qysym jasalatyny sózsiz — Pashınıan
EREVAN. KAZINFORM — Armenııa úkimeti qarasha aıynda jańa Konstıtýtsııanyń jobasyn jarııalaýdy josparlap otyr. Bul týraly Ulttyq jınalys (parlament — avt.) komıssııalarynyń birlesken otyrysynda el úkimetiniń basshysy Nıkol Pashınıan málimdedi, dep habarlaıdy Kazinform agenttiginiń Erevandaǵy menshikti tilshisi.
— Biz qarasha aıynda jańa Konstıtýtsııanyń jobasyn jarııalaımyz. Osydan keıin qoǵamdyq talqylaýlar bastalyp, usynystar qabyldanyp, qaralady. Bul úderis qujat qoǵamda jetkilikti deńgeıde talqylanǵansha jalǵasady, — dedi Nıkol Pashınıan.
Osy rette premer-mınıstr aldaǵy kezeńde úkimettiń aldynda turǵan mańyzdy mindetterdiń biri Ázerbaıjanmen beıbit kelisimge qol qoıý jáne ony ratıfıkatsııalaý ekenin atap ótti. Degenmen bul máselege qatysty oppozıtsııa ókilderiniń ustanymy úkimet kózqarasymen sáıkes kelmeı otyr.
— Konstıtýtsııany qabyldaý máselesin parlamenttik oppozıtsııa qoldamasa, onda bul olardyń Ázerbaıjanmen beıbitshilik ornatýǵa qarsy ekenin bildiredi. Mundaı jaǵdaıda oppozıtsııaǵa qoǵam tarapynan qysym jasalatyny sózsiz. Tıisinshe, bul qozǵalysqa Armenııa basqarýshy bıiliginiń ókilderi jetekshilik etýi tıis, — dep atap ótti Nıkol Pashınıan.
Eske salaıyq, taıaýda premer-mınıstr Nıkol Pashınıan jańa Konstıtýtsııany qabyldaý barysynda oppozıtsııamen ózara túsinistik tabylmasa, kezekten tys parlamenttik saılaý ótkizý múmkindigin qarastyratynyn aıtqan edi.
