Jańa Konstıtýtsııalyq baǵyt progreske jeteleıdi - saıasattanýshy
ASTANA. KAZINFORM – Jańa Konstıtýtsııa jobasy eldiń saıası-quqyqtyq damýynda mańyzdy kezeń sanalady. Abaı atyndaǵy QazUPÝ áleýmettik ǵylymdar kafedrasynyń meńgerýshisi, saıası ǵylymdar doktory Jomart Simtikovtiń aıtýynsha, qujattaǵy ózgerister tek tehnıkalyq túzetýlermen shektelmeı, qoǵamdaǵy qazirgi ahýaldy jáne bolashaq syn-qaterlerdi eskerýge baǵyttalyp otyr.
Ǵalymnyń pikirinshe, qujattaǵy óńirlik damý máselesine qatysty engizilgen arnaıy quqyqtyq rejımder oryndy sheshim bolyp kórinedi.
– Qazaqstan sııaqty aýmaǵy keń, biraq óńirler arasyndaǵy ekonomıkalyq alshaqtyq saqtalyp otyrǵan el úshin mundaı tetik ýnıtarlyq memlekettiń tutastyǵyn saqtaı otyryp, damýdy teńestirýge múmkindik beredi.
Sybaılas jemqorlyqpen kúreste usynylǵan ómir boıyna saılaný quqyǵynan aıyrý normasy – prıntsıpti ári saıası jaýapkershilikti arttyratyn qadam, – deıdi Jomart Simtikov.
Sonymen qatar saıasattanýshy soǵys pen qarýly qaqtyǵystardy nasıhattaýǵa tyıym salýdyń keńeıtilgen formasy Qazaqstannyń beıbitsúıgish saıasatyn konstıtýtsııalyq deńgeıde naqtylaı túsetinin atap ótti.
– Bul – qoǵamdy radıkaldanýdan qorǵap, azamattardyń sheteldik nemese ishki qaqtyǵystarǵa tartylýynyń aldyn alýǵa baǵyttalǵan mańyzdy qorǵanys mehanızmi. Prezıdenttik basqarý júıesine qatysty engizilgen bir rettik jeti jyldyq merzim men bılik sabaqtastyǵynyń naqty tártibi de saıası turaqtylyqty qamtamasyz etýge arnalǵan. Ýaqytsha ókilettikter men eki aı ishinde saılaý ótkizý talaby bılik vakýýmyna jol bermeıtin aıqyn ári ashyq mehanızm qalyptastyrady, – dep sanaıdy ǵalym.
Saıasattanýshynyń oıynsha, usynylyp otyrǵan Konstıtýtsııa jobasy quqyqtyq memleket qaǵıdattaryn nyǵaıtýǵa jáne ulttyq múddeni zamanaýı syn-qaterler jaǵdaıynda qorǵaýǵa baǵyttalǵan júıeli qujat retinde baǵalanýǵa laıyq.