Jańa Konstıtýtsııaǵa oraı Qazaqstannyń quqyqtyq saıasat tujyrymdamasy qaıta ázirlenedi
ASTANA. KAZINFORM — Ádilet mınıstrligi 2030 jylǵa deıingi Quqyqtyq saıasat tujyrymdamasyn jańa Konstıtýtsııa talaptaryna sáıkes jańartýǵa kiristi. Bul týraly Ádilet mınıstri Erlan Sársembaev málimdep, jańa qujat quqyqtyń adamǵa baǵdarlanǵan modelin, tsıfrlyq quqyq pen jasandy ıntellektini damytý baǵyttaryn qamtıtynyn aıtty.
Mınıstrdiń aıtýynsha, jańa Konstıtýtsııa memlekettiń jańa fılosofııasyn qalyptastyrdy. Sondyqtan quqyqtyq saıasattyń da fılosofııasy ózgerýi tıis.
Qazaqstan Respýblıkasynyń 2030 jylǵa deıingi quqyqtyq saıasat tujyrymdamasy 2021 jylǵy 15 qazanda bekitilgen jáne burynǵy konstıtýtsııalyq modelge sáıkes qabyldanǵan bolatyn.
— Al búgin jańa Konstıtýtsııanyń kúshine enýimen túbegeıli ózgerister oryn aldy. Konstıtýtsııa alǵash ret «Zań men Tártip» qaǵıdatyn, adamı kapıtaldy damytýdy, jaýapty ári jasampaz otanshyldyq ıdeıasyn, bilim berý, ǵylym jáne ınnovatsııany memlekettiń strategııalyq baǵyty retinde bekitti. Osyǵan baılanysty biz quqyqtyq júıeniń uzaq merzimdi damý baǵyttaryn aıqyndap, onyń tutastyǵyn qamtamasyz etýimiz tıis, — dedi Ádilet mınıstri Úkimettiń búgingi otyrysynda.
Demek, Konstıtýtsııa Ádiletti Qazaqstannyń qandaı bolýy kerektigin aıqyndasa, jańa Quqyqtyq saıasat tujyrymdamasy oǵan jetýdiń quqyqtyq jolyn kórsetýi qajet. Osyǵan baılanysty Ádilet mınıstrligi Quqyqtyq saıasat tujyrymdamasyn jańartý boıynsha tıisti tásilder ázirlep jatyr.
— Jańartylǵan tujyrymdama: quqyqtyń adamǵa baǵdarlanǵan modeline jáne memlekettik basqarýdyń jańa úlgisine kóshýdi; tsıfrlyq quqyqty, jasandy ıntellektini, ǵylym men ınnovatsııany damytýdy; jańa býyndaǵy ekologııalyq quqyqty jáne basqa da mańyzdy baǵyttardy qamtýy tıis. Quqyqtyq saıasat tujyrymdamasyn jańartý — 2026 jylǵy Konstıtýtsııa negizinde Qazaqstannyń jańa quqyqtyq arhıtektýrasyn qalyptastyrý bolyp sanalady. Ádilet mınıstrligi memlekettik organdarmen birlesip jańa Konstıtýtsııany sapaly iske asyrý baǵytyndaǵy jumysty jalǵastyrady, — dedi Erlan Sársembaev.
Aıta keteıik, búgin jańa Konstıtýtsııa kúshine endi. Jalpyhalyqtyq referendým nátıjesinde qabyldanǵan tarıhı qujat memlekettik basqarý júıesin, qoǵamnyń damý baǵytyn túbegeıli ózgertpek.
Prezıdent qazaqstandyqtardy Jańa Konstıtýtsııanyń kúshine enýimen quttyqtady.
Sondaı-aq Premer-mınıstr Oljas Bektenov barlyq memlekettik jáne qoǵamdyq ınstıtýtty túbegeıli jańǵyrtý bastalǵanyn aıtqan edi.
