Jańa Konstıtýtsııadaǵy ózgerister qalaı júzege asyp jatyr
ASTANA. KAZINFORM — Jańa Konstıtýtsııanyń qabyldanǵanyna úsh aıdan asty. Zańdaǵy ózgerister azamattardyń quqyǵyn qorǵaýdy kúsheıtýge jáne memlekettik organdardyń jaýapkershiligin arttyrýǵa baǵyttalǵan. Bul normalar is júzinde qalaı júzege asýda? Zańger, quqyq salasynyń zertteýshisi Mereke Qonyshanqyzy Jibek Joly telearnasynyń «Búgin Live» baǵdarlamasynda túsindirdi.
Sarapshynyń aıtýynsha, birpalataly Quryltaıdyń, Halyq keńesiniń jáne vıtse-prezıdent ınstıtýtynyń qyzmeti aldaǵy ýaqytta óz nátıjesin kórsetýi múmkin. Sonymen qatar jańa Konstıtýtsııa azamattardyń quqyqtaryn qorǵaý tetikterin jetildirýge negiz boldy.
— Adam quqyqtary jańa Konstıtýtsııada naqty aıqyndaldy. Kúdikti retinde ustalǵan adamnyń quqyqtaryn qorǵaý tetikteri de jetildirildi. Aldaǵy ýaqytta bul ózgeristerdiń oń nátıjesin kóremiz, — dedi Mereke Qonyshanqyzy.
Mańyzdy baǵyttardyń biri — kıberqylmyspen kúres. Sarapshynyń málimetinshe, qazir mundaı qylmystardyń sany 40 paıyzǵa azaıǵan. Sonymen birge alaıaqtyq pen transshekaralyq kıberqylmystarǵa qarsy halyqaralyq yntymaqtastyqty kúsheıtý jumystary da júrgizilip jatyr.
— Qazaqstan kıberqylmyspen kúreske halyqaralyq deńgeıde mán berip otyr. Bul baǵytta zańnamalyq sharalar qabyldanyp, memleketaralyq yntymaqtastyq damyp keledi, — dedi sarapshy.
Konstıtýtsııalyq kepildikter azamattardyń baspanaǵa qatysty quqyqtaryn da qamtıdy.
— Sot sheshiminsiz turǵyn úıden aıyrýǵa jáne odan shyǵarýǵa jol berilmeıdi. Turǵyn úıge kirý, ony qarap-tekserý jáne tintý zańda belgilengen jaǵdaılar men tártipke sáıkes júrgizilýi kerek. Sondaı-aq memleket baspanaǵa muqtaj azamattardy turǵyn úımen qamtamasyz etýge jaǵdaı jasaıdy. Ol zańda belgilengen sanattar men normalarǵa sáıkes beriledi. Bul talaptar azamattardyń jeke ómiri men baspanasynyń qaýipsizdigin qorǵaýǵa arnalǵan, — dep túsindirdi Mereke Qonyshanqyzy.
Aıta keteıik, jaqynda Quryltaıdyń jalpy otyrysynda «Qazaqstan Respýblıkasynyń memlekettik nagradalary týraly» Zańyna ózgerister endi.
