Jańa Konstıtýtsııada zııatkerlik menshikti qorǵaý alǵash ret bekitildi
ASTANA. KAZINFORM – Qazaqstannyń jańa Konstıtýtsııasynda zııatkerlik menshiktiń zańmen qorǵalatyny týraly norma alǵash ret bekitildi. Bul týraly Ortalyq kommýnıkatsııalar qyzmetinde ótken brıfıngide QR Ádilet vıtse-mınıstri Botagóz Jaqselekova aıtty.
Vıtse-mınıstrdiń sózinshe, bul norma adamnyń zııatkerlik jáne shyǵarmashylyq áleýetiniń el damýyndaǵy mańyzy artyp kele jatqanyn kórsetedi.
— Qazaqstan Respýblıkasynyń jańa Konstıtýtsııasynda alǵash ret zııatkerlik menshik zańmen qorǵalatyny týraly ereje bekitildi. Bul norma el damýynda adamnyń bilimi, oı eńbegi men shyǵarmashylyǵyna aıryqsha mán beriletinin kórsetedi, - dedi Botagóz Jaqselekova.
Onyń aıtýynsha, búginde zııatkerlik menshik júıesin damytý shyǵarmashylyqqa, ınnovatsııa men tehnologııalyq damýǵa jaǵdaı jasaýǵa baǵyttalǵan memlekettik saıasattyń mańyzdy baǵyttarynyń birine aınalyp otyr. Bul rette zııatkerlik menshik quqyqtaryn zańmen qorǵaýmen qatar, olardyń is júzinde saqtalýyn qamtamasyz etýge de mán beriledi.
Osy baǵyttaǵy jumystardyń biri – avtorlyq jáne sabaqtas quqyqtardy ujymdyq basqarý júıesin jetildirý. Qazir Ádilet mınıstrligi týyndylardyń paıdalanylýyn esepke alý, avtorlyq syıaqyny bólý jáne tóleý protsesterin ashyq júrgizýge arnalǵan Biryńǵaı tsıfrlyq platformany engizip jatyr.
