Jańa Konstıtýtsııada memlekettik táýelsizdigimizdiń irgeli negizi saqtalady - Ázimova
ASTANA. KAZINFORM – Jańa Konstıtýtsııada memlekettik táýelsizdigimizdiń irgeli negizi saqtalady. Bul týraly Konstıtýtsııalyq reformalar jónindegi komıssııanyń 6-otyrysynda Konstıtýtsııalyq sot tóraǵasy Elvıra Ázimova aıtty.
- Osy kúnderi komıssııanyń jumysy nátıjeli jáne mazmundy ótti dep aıtýǵa bolady. Biz túrli kózqarastar men usynystardy, pikirlerdi tyńdadyq. Bizdiń bárimizdi elimizdiń jáne Qazaqstan halqynyń bolashaǵyna degen jaýapkershilik biriktiredi. Konstıtýtsııalyq komıssııanyń jumysyna memlekettik jáne qoǵamdyq saladan 130 adam qatysyp jatyr. Bul tek zań shyǵarýshy, atqarýshy jáne sot bıliginiń ókilderi ǵana emes, sonymen qatar zańger-ǵalymdar, qoǵam qaıratkerleri, BAQ ókilderi. Sondaı-aq komıssııa jumysynyń alǵashqy kúnderinen bastap qoljetimdilik pen ashyqtyq qaǵıdaty saqtalyp keledi. Barlyq otyrystar ashyq kórsetilip jatyr, - dedi ol.
Komıssııa tóraǵasy jańa Konstıtýtsııa jobasyn talqylaǵanda basty nazardy quqyqtyq túzetýlerdiń kólemine emes, olardyń jańartylǵan mazmuny men mánine aýdarý mańyzdy ekenin erekshe atap óttti.
- Jańa Konstıtýtsııanyń negizinde adamǵa baǵyttalǵan memlekettik model kózdelgen. Onda adam, onyń quqyqtary, bostandyqtary men qadir-qasıeti eń joǵary qundylyq jáne memlekettik saıasattyń basty baǵdary retinde tanylǵan. Onda halyqtyń dástúrli qundylyqtarmen, tarıhı tájirıbesimen ádilettilik, jaýapkershilik jáne qoǵamdyq birlik týraly túsiniktermen tyǵyz baıllanysty prıntsıpter kórinis tapqan. Sondaı-aq tıimdi qoǵamdyq jáne saıası ınstıtýttardy damytý, bıliktiń esep berýin qamtamasyz etý jáne árbir azamattyń quqyqtary men bostandyqtaryn qorǵaý mehanızmderin kúsheıtý aıqyndalǵan. Konstıtýtsııada bizdiń memlekettik táýelsizdigimizdiń irgeli negizi saqtalady. Ol birtutas qurylymnyń ózgermeıtindigi, terrıtorııalyq tutastyqtyń buzylmaýshylyǵy jáne quqyqtyq tártiptiń negizgi prıtsınpteri berik qalady. Jańa mazmuny zamanaýı kepildikter arqyly nyǵaıa túsedi, - dedi Elvıra Ázimova.
Buǵan deıin Memlekettik keńesshi Erlan Qarın Jańa Konstıtýtsııadaǵy Qazaqstan Respýblıkasy qyzmetiniń negizgi qaǵıdattaryn ataǵan edi.