Jańa Konstıtýtsııada qorshaǵan ortany qorǵaý negizgi qaǵıdattarynyń biri retinde aıqyndaldy – Toqaev
ASTANA. KAZINFORM – Aımaqtyq jáne jahandyq deńgeıde kúsh jumyldyrýǵa basa mán beremiz. Bul týraly elordadaǵy Óńirlik ekologııalyq sammıtte Memleket basshysy Qasym-Jomart Toqaev málim etti.
– Jańa Konstıtýtsııamyzda qorshaǵan ortany qorǵaý memlekettik saıasat pen azamattyq jaýapkershiliktiń negizgi qaǵıdattarynyń biri retinde aıqyndaldy, ıaǵnı, biz úshin ekologııalyq qaýipsizdik pen ósip-órkendeý jaı ǵana másele emes. Ol ulttyq sana-sezimniń ajyramas bóligi jáne uzaqmerzimdi damý strategııasynyń arqaýy retinde qarastyrylady. Qazaqstan ekologııalyq taza energııa óndirisine kóshý, bıoalýantúrlilikti qorǵaý, tozǵan jerlerdi qalpyna keltirý, sý resýrstaryn basqarý júıelerin jetildirý, sý únemdeý saıasatyn engizý, qorshaǵan ortany qorǵaý salasyndaǵy óńirlik yntymaqtastyqty nyǵaıtý baǵyttaryndaǵy sharalardy qolǵa aldy. Álbette, eshbir el jalǵyz jortyp, tabysqa jete almaıdy, - dedi Qasym-Jomart Toqaev.
Sondyqtan Prezıdent aımaqtyq jáne jahandyq deńgeıde kúsh jumyldyrýǵa basa mán beretinimizdi atap ótti.
– Biz atalǵan mindetti naqty is, jańa tehnologııalardy ıgerý jáne turaqty damýǵa uzaqmerzimdi ınvestıtsııa salý arqyly oryndaımyz, - dedi Memleket basshysy.
Budan buryn habarlanǵandaı, búgin elordada Memleket basshysy Qasym-Jomart Toqaevtyń qatysýymen «Ornyqty bolashaqqa ortaq kózqaras» taqyrybymen Óńirlik ekologııalyq sammıt (ÓES) jumysyn bastady.
