Bıýdjet esebinen sheteldikterdi áleýmettik qorǵaý toqtatylmaq — Jańa Konstıtýtsııa

ASTANA. KAZINFORM — Qazaqstanǵa kelgen sheteldikterdiń áleýmettik tólemderin bıýdjet esebinen óteý toqtatylady. Bul týraly Májilis depýtaty, Konstıtýtsııalyq reforma jónindegi komıssııasynyń múshesi Murat Ábenov komıssııanyń jetinshi otyrysynda aıtty.

Óz sózinde depýtat bul máseleni el azamattary kópten beri kóterip júrgenin aıtty.

— Bizdiń Konstıtýtsııada elimizge kelgen sheteldikterdiń áleýmettik jáne ártúrli quqyqtary bizdiń azamattarmen birdeı dep jazylǵan. Sonda shetelden kelgen azamattar bizdiń medıtsınany, bizdiń bilim salasyn, barlyq áleýmettik kómekterdi alýyna quqyly. Ol Konstıtýtsııada jazylǵan. Aldaǵy ýaqytta bul da ózgeredi, — dedi M. Ábenov elordada Konstıtýtsııalyq sot ǵımaratynda.

Endi tek qana halyqaralyq kelisim arqyly Qazaqstan azamattarynyń quqyqtaryn tolyqqandy qorǵaıtyn memlekettiń ǵana azamattaryna qoldaý kórsetilmek.

— Qazir kóp jaǵdaıda sheteldikterdiń medıtsınasyn, bilim salasyna qatysty shyǵyndardy óz bıýdjetimizden tólep jatyrmyz. Jyl saıyn elimizge mıllıondaǵan adamdar keledi. Biraq bizdiń bıýdjetimiz sheksiz emes. Sol sebepti bul azamattar talabynan týǵan ádil sheshim dep oılaımyz. Bul konstıtýtsııalyq retteýdiń maqsaty — negizgi konstıtýtsııalyq qundylyqtardyń turaqtylyǵyn, azamattardyń quqyqtyq kepildikterin, sondaı-aq zańnamalardyń úılesimdiligi men ádilettiligin qamtamasyz etý, — dedi Májilis depýtaty.

Buǵan deıin Murat Ábenov Qazaqstan ratıfıkatsııalaǵan halyqaralyq kelisimderden Konstıtýtsııa basym turatynyn, birinshi kezekte Ata zań baptary qoldanylatynyn aıtqan edi.