Jańa Konstıtýtsııada eńbek quqyqtaryna erekshe mán berilgen – sarapshy
ASTANA. KAZINFORM – Búginnen bastap qoldanysqa engen jańa Konstıtýtsııa azamattardyń quqyǵy men bostandyqtaryn qorǵaýdy jańa deńgeıge kóteredi. Bul týraly Ál-Farabı atyndaǵy Qazaq ulttyq ýnıversıtetiniń professory, zań ǵylymdarynyń doktory Alýa Ibraeva aıtty.
– 18-bapta adam quqyqtary men bostandyqtary memlekettiń basty basymdyǵy retinde belgilengen. Bul azamattardyń quqyqtyq sheshimderi endi naqty standarttarmen qorǵalatynyn bildiredi. Sonymen qatar ádildik, zań jáne tártip Konstıtýtsııanyń negizgi tiregine aınaldy. Adamnyń ar-namysy men qadir-qasıeti qol suǵylmaıtyn qundylyq retinde qorǵalady, – deıdi spıker.
Professordyń aıtýynsha, jańa Konstıtýtsııa tsıfrlyq dáýirdiń talaptaryna da jaýap beredi.
– Jeke derekterdiń qorǵalýy men tsıfrlyq qyzmetterdiń qaýipsizdigi – zamanaýı quqyqtyq júıeniń basty talaptarynyń biri. Sondyqtan mundaı normalardyń Ata zańda aıqyndalýy azamattardyń quqyqtaryn jańa dáýir talaptaryna saı qorǵaýdy kúsheıtedi, – deıdi Alýa Ibraeva.
Sonymen qatar jańa Konstıtýtsııa áleýmettik quqyqtardyń kepildigin kúsheıtip, memlekettiń jaýapkershiligin naqtylaıdy.
– Konstıtýtsııanyń 27-babynda «Árkimniń eńbek etýge quqyǵy bar» degen norma bekitilgen. Árbir azamat mamandyǵy men jumys ornyn erkin tańdaı alady jáne eshkim zańsyz májbúrli eńbekke tartylmaıdy. Sonymen birge azamattar qaýipsiz eńbek jaǵdaıyna jáne kemsitýsiz eńbekaqy alýǵa quqyly, – deıdi ǵalym.
Sóz sońynda spıker jańa qujattyń mańyzdy basymdyqtardy aıqyndaǵanyn alǵa tartty. Onyń aıtýynsha, adamı kapıtaldy damytý, bilim, ǵylym men ınnovatsııany qoldaý, sondaı-aq zııatkerlik menshik quqyǵyn qorǵaý memlekettiń strategııalyq baǵyty retinde bekitilgen. Osylaısha, negizgi zańnyń mazmuny men qurylymy qazirgi zaman talaptaryna saı jańartylyp, azamattardyń quqyǵyn qorǵaýdyń jańa quqyqtyq negizi qalyptasty.
Buǵan deıin Oqý-aǵartý mınıstrligi jalpy bilim beretin mektepterge arnalǵan jańa oqýlyqtar ázirlep, olarǵa jańa Konstıtýtsııanyń normalary engizilgenin jazǵan edik.
