Jańa Konstıtýtsııada dala demokratııasynyń qaǵıdattary kórinis tapqan — Marat Báshimov
ASTANA. KAZINFORM — Elordada jańa Konstıtýtsııanyń mazmuny ǵana emes, ony quqyqtyq qoldaný tájirıbesi de talqylandy. Dóńgelek ústel QR Ulttyq akademııalyq kitaphanasynda ótti.
Jıynǵa zańgerler, saıasattanýshylar, qoǵam qaıratkerleri jáne Ádilet mınıstrligi janyndaǵy Qoǵamdyq keńes músheleri qatysty.
Sarapshylardyń pikirinshe, Konstıtýtsııany bilý bir bólek, ony zańǵa saı ómirde qoldaný bir bólek. Osy maqsatta bas qosqan mamandar Ata zań normalarynyń is júzinde júzege asyrylý tetikterin talqylady.
— Konstıtýtsııanyń qoldanylýy kóp nársege baılanysty. Bul — quqyq qorǵaý organdarynyń, ákimdikterdiń jáne azamattardyń óz quqyqtaryn bilip, ony qoldaný protsesi. Sondyqtan basty másele — quqyqtyq normalardyń tájirıbede durys júzege asyrý. Ol úshin naqty baǵyt-baǵdar qajet. Osy maqsatta zańgerler arnaıy bas qosyp, Konstıtýtsııa normalaryn qoldaný tetikterin talqyladyq. Bizdiń mindetimiz — Ata zańnyń baıandy, halyqqa jaqyn bolýyna yqpal etetin quqyqtyq tájirıbeni qalyptastyrý, — dedi Qazaqstan zańgerler odaǵynyń tóraǵasy Serik Aqylbaı.
Onyń aıtýynsha, kez kelgen zańnyń tıimdiligi ony qabyldanýymen emes, is júzinde durys qoldanylýymen baǵalanady.
— Qandaı zań bolmasyn, ony qabyldaǵannan keıin durys qoldaný mańyzdy. Eger zań talaptary is júzinde durys oryndalmasa, onyń halyqqa da, ekonomıkaǵa da berer paıdasy az bolady. Sondyqtan zań naqty bolýy kerek jáne ony oryndaý barysynda Konstıtýtsııa talaptarynan aspaı, bireýdiń quqyǵyn buzbaý qajet, — dedi ol.
Al Májilis depýtaty Marat Báshimov óz sózinde qazaq dalasynda ǵasyrlar boıy qalyptasqan dala demokratııasynyń qaǵıdattary jańa Konstıtýtsııada da kórinis tapqanyn atap ótti.
— Ata zańnyń preambýlasynda qazaq halqynyń myńjyldyq tarıhy, dala quqyǵy men quqyqtyq dástúrleri sabaqtastyǵy aıqyn kórsetilgen. Bul — táýelsizdikke, egemendikke, el taǵdyryna jaýapkershilik jáne adam quqyqtaryn qurmetteý qaǵıdattary. Qazaq qoǵamynyń quqyqtyq tarıhynda ózindik erekshelikter bar. Máselen, qazaq dalasynda ólim jazasy eshqashan qoldanylmaǵan. Bul — tarıhı turǵydan mańyzdy quqyqtyq qubylys. Sondyqtan dala demokratııasy, quqyqtyq dástúr jáne memleket pen azamattyq qoǵamnyń ózara baılanysy — mańyzdy máselelerdiń biri, — dedi ol.
Aıta keteıik, buǵan deıin Qyzylordada «Konstıtýtsııa — azamattyq qoǵamdy damytýdyń quqyqtyq irgetasy» taqyrybynda oblystyq forým ótkenin jazǵanbyz.
