Jańa Konstıtýtsııada azamattar quqyǵyna 30 bap arnalǵan – depýtat
ASTANA. KAZINFORM — Jańa Konstıtýtsııany qoldaıtyn Jalpyulttyq koalıtsııa óńirlerdi aralap, kezdesýler ótkizip júr. Koalıtsııa múshesi, Parlament Májilisiniń depýtaty Erlan Saırov Jibek Joly telearnasyna suhbat berip, turǵyndar jıi qoıatyn suraqtar jóninde pikir bildirdi.
Depýtat Shyǵys Qazaqstan, Soltústik Qazaqstan, Abaı oblystaryna barǵanyn, ondaǵy halyqtyń qyzyǵýshylyǵy joǵary ekenin atap ótti.
— Konstıtýtsııa jobasy qyzý talqylanyp jatyr. Bul bizdiń azamattarymyzdyń Qazaqstan bolashaǵyna beıjaı qaramaıtynyn kórsetedi. Halyqtyń basym kópshiligi Konstıtýtsııa jobasyn qoldap otyr. Ásirese turǵyndar jańa qujattaǵy azamattardyń quqyǵy máselesin jıi suraıdy. Bul Konstıtýtsııada azamattardyń quqyǵy máselesine 30 bap arnalǵan. Demek aldyńǵy Konstıtýtsııa sekildi azamattardyń memleketke emes, kerisinshe memlekettiń azamatqa qyzmet etýine basymdyq berilip otyr, — dedi Májilis depýtaty.
Jańa Konstıtýtsııadaǵy turǵyndardy qyzyqtyrǵan eń negizgi taqyryp – memlekettiń áleýmettik mindettemeleri bolyp otyr. Qazaqstan – áleýmettik memleket, el bıýdjetiniń 40-45 paıyzy áleýmettik salaǵa baǵyttalady.
Onyń aıtýynsha, jańa Konstıtýtsııa jobasynda balalarǵa tegin bilimge kepildik berilip, orta bilim alý mindetti dep jazylǵan. Al joǵary bilimdi jastar konkýrs arqyly tegin ala alady. Sondaı-aq eldegi 2,6 mln zeınetkerge zeınetaqy tóleý úshin bıýdjettiń 5/1 bóligi – 4,9 trln teńge bólinedi. Jańa Konstıtýtsııada osyndaı áleýmettik mindettemeler artatyn bolady.
– Jańa Konstıtýtsııadaǵy birinshi jańashyldyq adam kapıtalyn arttyrý bolsa, ekinshisi – Qazaqstannyń qandaı da bir azamatyna belgili bir zalal tıse, ol sotta dáleldense, memleket oǵan ótemaqy tóleýi kerek. Bul másele memlekettiń halyq aldyndaǵy quqyqtyq jaýapkershiligi artyp kele jatqanyn bildiredi. Konstıtýtsııada azamattar quqyǵy artsa, Konstıtýtsııalyq sottyń da mańyzy kóbeıedi, – dedi E.Saırov.
Sonymen birge, jańa Konstıtýtsııa qabyldasansa, Qazaqstan zańdarynyń basym kópshiligi ózgertiledi.
– Eki aıdan keıin Parlament taratylatyndyqtan, osy eki aıda Prezıdent týraly, Quryltaı týraly, Halyq keńesi týraly, Úkimet týraly negizgi zańdarǵa ózgeris engizip úlgerý kerek. Bul bizdiń qoǵamdyq-saıası ekonormıkalyq ómirimizdi qaıta quratyn qujat bolmaq. Sondyqtan muny tek saıası reforma emes, quqyqtyń reforma dep te qabyldaý kerek, – dedi Erlan Saırov.
Aıta keteıik, «AMANAT» partııasynyń Áıelder qanaty jańa Konstıtýtsııa jobasyn talqylady.