Jańa Konstıtýtsııa jobasynyń saıası sıpaty táýelsizdiktiń turaqtylyǵyna baǵyttalǵan - Ermurat Bápı
ASTANA. KAZINFORM — Qazaqstannyń tutastyǵyn, qaýipsizdigi men egemendigin qamtamasyz etý – eliniń erteńin oılaǵan árbir azamattyń mindeti bolýy kerek.
Bul týraly búgin Májilistiń jalpy otyrysynda Jańa Konstıtýtsııa jobasyn talqylaý kezinde depýtat Ermurat Bápı málim etti.
- «Jańa Qazaqstandy» qalyptastyrý suranystaryna sáıkes, bizdiń qoǵam elde saıası ózgerister bolýy kerek degen talapty talmaı aıtyp kele jatqany málim. Biraq biz elde burynǵy 30 jyl boıy qalyptasqan, siresken saıası rejımniń seńi 2022 jylǵy referendýmnyń barysynda sógile bastalǵanyna mán bermeı júrmiz. Sondaǵy alǵashqy reformanyń nátıjesinde birte-birte qalyptasqan qundylyqtardy baǵalaı almaı júrgen «sozylmaly qarsylyq dertimiz» ózimiz ańsap kelgen konstıtýtsııalyq ózgeristerdi ógeı kórgenimiz tipten túsiniksiz jaǵdaı bop tur. Búgingi qoǵamda, ásirese áleýmettik jelilerde, sońǵy alty aı kóleminde sulbasy jasalǵan konstıtýtsııalyq ózgeristerge qatysty batyl, biraq bir jaqtan syńarjaq syndar kóp aıtyldy. Árıne, azamattyq ustanymmen jáne memlekettik múdde turǵysynda aıtylatyn syndarly synǵa shekteý bolmaýy tıis. Biraq sondaı syn aıtýdyń múmkindigi qoǵamdyq qundylyq ekenin taǵy da baǵalaı bilýimiz kerek, - dedi E. Bápı.
Sonymen qatar ol jańa Konstıtýtsııanyń jobasyna qatysty aıtylyp jatqan biraz syndarly sózdiń tórkini tilge tirelip jatqanyn jetkizdi.
- Ulttyq namysy selt etip oıanǵan halyqtyń talaby teris dep, úzildi-kesildi kereǵar pikir aıtýdyń jóni joq. Bul taqyrypty jyly jaýyp qoıýǵa taǵy da bolmaıtyn edi. Biraq qazaqta «basqa pále – tilden» degen taǵy bir támsil bar. Daýyly dúleı qazirgi qatqyl halyqaralyq qatynastardyń qorshaýy men tártibi kún saıyn qyryq qubylǵan geosaıası álemde biz bul «páleniń» qaterinen saqtana bilýimiz kerek. Biz áperbaqan, áýmesir áldekimderge bilek kúshin bezeıtindeı el emespiz. Bizde memleketimizdiń táýelsizdigi men jasampaz bolashaǵy úshin syrttaǵy soqtyqpaly-soqpaqty joldy dıplomatııanyń demeýimen jáne syrbaz saıasatpen júrip ótýden basqa alternatıva joq! Jalpyhalyqtyq talqylaýǵa usynylǵan jańa Konstıtýtsııa jobasynyń jalpy saıası sıpatyn salaýatty saralaı bilgen adam onyń mazmuny men maqsaty memlekettilikti, qaýipsizdigimiz ben táýelsizdiktiń turaqtylyǵyn kúıtteıtin astarly ısharany túsinse kerekti. Úles salmaǵy 70 paıyzdan asqan halyq óziniń tilin ózgege óktemdikpen emes, sary maıǵa ystyq qasyq batyrǵandaı baıyppen tańa bilý – dál búgin áldeqaıda utymdy aıla bolar edi. Tildi teketires pen eregestiń qarýyna aınaldyrý bizge ábúıir ápermeıdi. Óziniń tilin óktemdikpen tyqpalaǵan ımansyz ıdeıalar paıda bolǵan zamanda, esermen egesý – estiniń isi bolmaıdy, - dedi depýtat.
Onyń paıymynsha, Qazaqstan men onyń syrtyndaǵy realdy baǵalaı, baǵamdaı almaǵan saıası kórsoqyrlyq eldi oryny tolmas ókinishterge tap qylýy múmkin.
- Sebebi, dál osy syrtqy táýekelder tónip turǵan jaǵdaıdyń jaı-japsaryn jurtshylyqqa aıtam dep, ózimniń jeke qoǵamdyq-saıası ımıdjime nuqsan kelip jatsa da, men naqty real sıtýatsııany sóz qylýdan jaltarmaımyn. Memlekettik múdde men elimizdiń táýelsizdigi aldyndaǵy meniń jeke bas abyroıym túk te emes! El ishinde bedeli bar Sadýaqas Ańsat, Aıtqoja Fazyl, Rysbek Sársenbaı aǵalarym da qoǵamdy qopańdatýdan buryn, tóńiregindegi jurtshylyqty sabyrǵa shaqyryp, pisimillasy endi ǵana bastalǵan ózgeristerdi aqsaqaldyq ar-ojdanmen qabyldaı alsa degen inilik tilegim bar! Sóz sońynda aıtarym – Qazaqstannyń tutastyǵyn, qaýipsizdigi men egemendigin qamtamasyz etý – eliniń erteńin oılaǵan árbir azamattyń mindeti bolýy kerek!, - dedi Ermurat Bápı.
Budan buryn habarlanǵandaı, búgin Májilis Jańa Konstıtýtsııa jobasyn talqylaıtynyn jazǵan edik.