Jańa Konstıtýtsııa jobasynyń ár babyna shamamen 52 usynystan tústi - Serik Egizbaev
ASTANA. KAZINFORM — Ata Zańnyń jańa jobasynda volonterlik qyzmettiń mártebesi aıqyndalady. Eriktiler eńbegin Konstıtýtsııalyq deńgeıde bekitý máselesi keńestiń kezekti otyrysynda talqylandy.
Bul týraly Jibek Joly telearnasynyń «Búgin LIVE» baǵdarlamasyna bergen suhbatynda QR Parlamenti Májilisiniń depýtaty, «Aýyl» partııasy fraktsııasynyń jetekshisi Serik Egizbaev aıtty.
– Konstıtýtsııa keńesiniń onynshy otyrysynda mańyzdy usynystardyń biri talqylanyp, qoldaý tapty. Qaralyp jatqan Konstıtýtsııanyń 31-babyna eriktiler qyzmetiniń mártebesin aıqyndaý týraly sarapshylar tarapynan usynys túsken. Komıssııa músheleri bul bastamany biraýyzdan qoldady. Aıta ketý kerek, eriktiler qozǵalysy – qoǵamdyq mańyzy zor bastamalardyń biri. Olardyń áleýmettik jáne qoǵamdyq saladaǵy jumystary joǵary nátıjeler kórsetip keledi. Osyǵan baılanysty usynys oryndy dep tanylyp, jańa Konstıtýtsııa jobasyna engizilmek, – deıdi Serik Egizbaev.
Spıkerdiń sózinshe, Konstıtýtsııa keńesine 5 myńnan astam usynys túsken. Ótinimniń sanyń jańa Konstıtýtsııa jobasyndaǵy 95 bapqa shaqqanda, ár bapqa shamamen 52 usynystan keledi.
– Bul qoǵamnyń Konstıtýtsııany talqylaýǵa belsendi qatysyp, óz pikirin bildirýge qyzyǵýshylyq tanytyp otyrǵanyn kórsetedi. Depýtat Azat Turlybekuly da Konstıtýtsııanyń 8-babyna qatysty usynys bildirdi. Qoldanystaǵy normada Qazaqstan Respýblıkasynda memlekettik jáne jeke menshik tanylyp, qorǵalatyny kórsetilgen. Alaıda sarapshylardyń pikirinshe, álemde menshiktiń alty túri bar, al Ata Zańda olardyń tek ekeýi ǵana qamtylǵan. Qoǵamdyq menshik, turǵyn úı qorlary men kooperatıvter sekildi ózge de menshik nysandary Konstıtýtsııada naqty kórsetilmegen. Osyǵan baılanysty menshik túrleriniń barlyǵy memleket pen zań tarapynan qorǵalýy tıis degen usynys aıtyldy. Komıssııa bul bastamanyń da qoldaý tabatynyna senim bildirdi, - deıdi QR Parlamenti Májilisiniń depýtaty.
Osy tusta Serik Egizbaev Ata Zańnyń jańa jobasyna «Aýyl» partııasy atynan usynylǵan birqatar bastamalarǵa da toqtaldy.
– Konstıtýtsııaǵa ózgeris engizý jumystary ótken jyldyń qazan aıynda bastalǵan. Alǵashynda parlamenttik reforma qolǵa alynyp, keıin konstıtýtsııalyq reformaǵa ulasty. Osy kezeńde «Aýyl» partııasy barlyq baptarǵa qatysty óz usynystaryn joldady. Atap aıtqanda, jańa Konstıtýtsııada qorshaǵan ortany qorǵaý men ekologııa máselelerin naqtylaı túsý jaıynda másele kóterdik. Quzyrly organdar men azamattardyń tabıǵatty qorǵaýdaǵy mindetterin aıqyndap jazý usynyldy. Bul bastama Konstıtýtsııalyq keńes tarapynan qoldaý taýyp, jańa zańǵa engiziledi dep kútilýde, – deıdi ol.
Eske sala keteıik, búgin balalar múddesi aıasynda baspanadan shyǵarýǵa jol bermeıtin kepildikter bekitý mańyzy da talqylandy.