Jańa Konstıtýtsııa jobasynda din men memlekettiń ara-jigi naqty ajyratylǵan – Konstıtýtsııalyq komıssııa

ASTANA. KAZINFORM — Konstıtýtsııada nekeniń er adam men áıel adamnyń erikti tańdaýy men teń quqyǵyna negizdelgen odaq ekendigi anyq kórsetilgen. Bul týraly Konstıtýtsııalyq reforma jónindegi komıssııanyń toǵyzynshy otyrysynda QR Premer-mınıstriniń orynbasary – Mádenıet jáne aqparat mınıstri Aıda Balaeva málim etti.

- Jańa Konstıtýtsııa jobasynda din men memlekettiń ara-jigi naqty ajyratylyp, bilim berý men tárbıe júıesiniń zaıyrly sıpaty aıqyndalǵan. Bilimniń zaıyrly bolýy kópkonfessııaly qoǵam úshin jas urpaqtyń dúnıetanymyn keńeıtip qana qoımaı, qoǵamdaǵy kelisim men turaqtylyqty nyǵaıtýǵa yqpal etedi. Sondaı-aq Konstıtýtsııada nekeniń er adam men áıel adamnyń erikti tańdaýy men teń quqyǵyna negizdelgen odaq ekendigi anyq kórsetilgen. Bul tujyrym qoǵamdaǵy otbasy ınstıtýtynyń mańyzyn kórsetedi. Sondyqtan mundaı qaǵıdatty oryndy dep oılaımyn, - dedi A. Balaeva.

Onyń aıtýynsha, atalǵan norma otbasy ınstıtýtynyń turaqtylyǵyn nyǵaıtýǵa, dástúrli qundylyqtardy quqyqtyq deńgeıde qorǵaýǵa jáne áıelderdiń quqyǵy men zańdy múddelerin kúsheıtýge negiz bolary anyq.

Budan buryn habarlanǵandaı, Kazinform agenttiginiń qazaq jáne orys tilindegi Telegram arnasynda Konstıtýtsııalyq komıssııa otyrysynan mátin translıatsııasy bolady.