Memleket basshysyna pysyqtalǵan jańa Konstıtýtsııa jobasyn respýblıkalyq referendýmǵa shyǵarýdy usyný qajet – Elvıra Ázimova
ASTANA. KAZINFORM – Jańa Konstıtýtsııa jobasynda azamattardyń quqyqtary men bostandyqtaryn teń qamtamasyz etýge, memlekettilikti nyǵaıtýǵa jáne adam quqyqtaryn qorǵaýǵa baǵyttalǵan normalar engizildi. Bul týraly Konstıtýtsııalyq komıssııa tóraǵasy Elvıra Ázimova HІІ otyrysta habarlady.
– Jobaǵa azamattar, quqyqtanýshylar, qoǵamdyq uıymdar men sarapshylar tarapynan myńdaǵan usynystar tústi. Olardy jan-jaqty zerdeleý barysynda Konstıtýtsııanyń árbir baptaryna túzetýler men tolyqtyrýlar engizildi, – dedi Elvıra Ázimova.
Onyń aıtýynsha, komıssııa jumysy tek otyrystarmen shektelmeı, taqyryptyq jumys toptarynda, halyqpen kezdesýlerde jáne keń talqylaýlar arqyly da júrgizildi. Komıssııa quramynda ártúrli sala ókilderinen quralǵan 130 azamat bar.
– Azamattar men sarapshylardyń usynystarynyń basym bóligi eskerildi. Keıbir usynystar jobada tikeleı kórinis tapsa, basqalary mátindik nusqada nemese kontseptýaldy sheshimderde óz áserin kórsetti. Mysaly, jańa Konstıtýtsııa jobasynda advokat mártebesi, menshik quqyǵynyń kepildikteri, memleket tarapynan keltirilgen zııandy óteý quqyǵy, ekologııalyq qaýipsizdik, azamattyq máseleler jáne basqarý formalary qamtyldy, – dedi komıssııa tóraǵasy.
Elvıra Ázimova atap ótkendeı, komıssııa barlyq usynystardy halyqaralyq tájirıbe men ulttyq múddeni úılestire otyryp, salmaqty sheshimder qabyldaýǵa umtyldy.
– Qazaq tiliniń sapasyna erekshe kóńil bólindi, termınologııa jańartyldy jáne qazirgi zań shyǵarý talaptaryna sáıkes, aldaǵy tájirıbege baǵdar bolarlyq mańyzdy qadam jasaldy. Barlyq otyrystar onlaın kórsetilip, qoǵamnyń ashyq túrde qatysýyna múmkindik berildi, – dedi ol.
Komıssııa tóraǵasy jańa Konstıtýtsııa jobasyn respýblıkalyq referendýmǵa shyǵarýdy qoldaıtynyn atap ótti.
– Komıssııa Prezıdent janyndaǵy konsýltatıvtik keńes organy bolǵandyqtan, kópshilik pikirdi eskere otyryp, Memleket basshysyna pysyqtalǵan jańa Konstıtýtsııa jobasyn respýblıkalyq referendýmǵa shyǵarýdy usyný qajet dep sanaımyn. Referendým árbir Qazaqstan azamatyna jańa Konstıtýtsııa jobasy boıynsha óz pikirin bildirýge múmkindik beredi. Eger Memleket basshysy referendým ótkizý týraly sheshim qabyldasa, Konstıtýtsııalyq reformalar jónindegi komıssııanyń mıssııasy tolyq oryndalady. Sonymen qatar, komıssııa músheleri óz jumystaryn ári qaraı jalǵastyra beredi, – dedi Elvıra Ázimova.
Jańa Konstıtýtsııa ádilettik pen turaqtylyqqa, qoǵam senimine negizdelýi tıis. Joba, sondaı-aq Konstıtýtsııalyq sot jobasymen birge, arnaıy Telegram kanaly men basqa áleýmettik jelilerde jarııalanatyny aıtyldy.
– Jańa Konstıtýtsııa memlekettilikti nyǵaıtyp, árbir adamnyń quqyqtary men bostandyqtaryn qorǵaýǵa baǵyttalǵan. Biz ortaq nıetpen, úlken jaýapkershilikpen mańyzdy jumys atqardyq.
Barshańyzǵa úlken rahmet. Komıssııa jumysynyń nátıjesi memleket basshysyna baıandalady, – dedi komıssııa tóraǵasy.
Aıta keteıik, 31 qańtarda Konstıtýtsııalyq reformalar jónindegi komıssııa Qazaqstan Respýblıkasynyń jańa Ata Zańynyń jobasyn jarııalady.