Jańa Konstıtýtsııa jobasyn jalpyhalyqtyq referendýmǵa shyǵarýdy usynamyn — Magerramov
ASTANA. KAZINFORM — Elimizdiń negizgi zańy búgingi zamannyń talaby men ishki-syrtqy syn-qaterlerge saı úılestirilýi tıis. Bul týraly Konstıtýtsııalyq komıssııanyń on ekinshi otyrysynda QR Parlamenti Májilisiniń depýtaty Magerram Magerramov aıtty.
Depýtattyń paıymdaýynsha, jańa Konstıtýtsııa jobasynda alǵash ret «Ádiletti Qazaqstan» qundylyǵy memlekettik damýdyń irgeli baǵdary retinde bekitilip otyr.
— «Ádiletti Qazaqstan» — bul zań men tártip qaǵıdalary múltiksiz saqtalatyn, múmkindikter teńdigi men quqyqtar kepildik beriletin el. Sonymen qatar, Ata zańnyń preambýlasynda bizdiń ulttyq qundylyqtarymyz, tarıhı jadymyz ben Uly dala memleketteriniń sabaqtastyǵy jazylǵan. Bul — ýaqyt ótse de ózgermeıtin temirqazyǵymyz, — dedi Magerram Magerramov.
Sondaı-aq, depýtat Qazaqstan Halyq partııasynyń músheleri eńbek etý quqyǵy men ekologııalyq mádenıetke qatysty normalardy qoldaıtynyn jetkizdi. Onyń aıtýynsha, endi memlekettik saıasat tek ekonomıkalyq kórsetkishter emes, eńbek adamynyń múddesi tóńireginde qurylýy tıis.
— Jańa Konstıtýtsııada eńbek — qundylyq, al jumysshynyń áleýmettik qorǵalýy — memlekettiń mindeti. Bul óndiris pen ınfraqurylymda eńbek adamynyń múddesi birinshi orynda bolady degen sóz. Sondaı-aq biz bir palataly Parlament, Halyq keńesi jáne Vıtse-prezıdent laýazymyn engizý sııaqty ınstıtýtsıonaldyq ózgeristerdi tolyq qoldaımyz. Memleket endi tek ákimshilik protsesterimen emes, azamattarǵa qyzmet etý qaǵıdatymen qurylady, — dedi halyq qalaýlysy.
Sonymen qatar Magerram Magerramov Konstıtýtsııa jobasynyń ashyq demokratııalyq pikirtalastardyń nátıjesinde daıyndalǵanyn atap ótti. Ol partııanyń barlyq óńirlik fılıaldarynda ótken kezdesýlerde halyqtyń jobany biraýyzdan qoldaǵanyn alǵa tartty.
— Bul qujat — ótkenin saralap, bolashaǵyn baǵamdaǵan halyqtyń birligi men yntymaqtastyǵynyń nátıjesi. Osyny eskere otyryp, jańa Konstıtýtsııa jobasyn jalpyhalyqtyq referendýmǵa shyǵarýdy usynamyn, — dep túıindedi depýtat.
Aıta keteıik, Konstıtýtsııalyq sot tóraǵasynyń orynbasary Baqyt Nurmuhanov Konstıtýtsııa jobasynda turǵyn úıge qolsuǵylmaýshylyq kepildikteri kúsheıtilgenin aıtqan edi.