Jańa Konstıtýtsııa jobasy sóz bostandyǵyna kepildik beredi - Aıda Balaeva
ASTANA. KAZINFORM — Usynylyp otyrǵan normalar sóz bostandyǵyn shekteýge emes, ár adamnyń ar-namysyn qorǵaýǵa baǵyttalǵan. Bul týraly Konstıtýtsııalyq reforma jónindegi komıssııanyń 9-otyrysynda QR Premer-mınıstriniń orynbasary – Mádenıet jáne aqparat mınıstri Aıda Balaeva málim etti.
- Kópshilik tarapynan sóz bostandyǵyna qatysty máselege aıryqsha mán berilip otyr. Azamattar Konstıtýtsııadaǵy tujyrymdardyń aıqyn ári ekiushty túsindirýge jol bermeıtindeı bolýyn kútedi. Jańa Konstıtýtsııa jobasy damyǵan memleketterdiń tájirıbesine súıene otyryp, sóz bostandyǵyna kepildik beredi. Usynylyp otyrǵan normalar sóz bostandyǵyn shekteýge emes, ár adamnyń ar-namysy men qadir-qasıetin, jeke ómirine qol suqpaýyn qorǵaýǵa baǵyttalǵan. Bul halyqaralyq quqyq talaptarǵa tolyq sáıkes keledi, - dedi A. Balaeva.
Onyń aıtýynsha, azamattyq jáne saıası quqyqtar týraly halyqaralyq kelisimniń 19-babyna saı, ár adam óz oı-pikirin erkin ustanýǵa quqyly. Deı turǵanmen, onda basqa adamdardyń quqyqtary men abyroıyn qorǵaý, ulttyq qaýipsizdikti, qoǵamdyq tártipti saqtaý maqsatynda zańmen shektelýi múmkin ekeni anyq jazylǵan.
- Jańa Konstıtýtsııa jobasyndaǵy bapqa qatysty jýrnalısterdiń ashyq hatyna keler bolsaq, medıaqaýymdastyqtyń úndeýimen muqııat tanysyp shyqtym. Mádenıet jáne aqparat mınıstri, ári Konstıtýtsııalyq reforma jónindegi komıssııa múshesi retinde bul túzetýler esh jaǵdaıda sóz bostandyǵyn shekteýge ákep soqpaıtynyn senimmen aıta alamyn. Qorytyndylap aıtsam, burynnan belgilengen bul túzetýler jańashyldyq emes, onyń ishinde jaýapkershilikke ákep soǵatyn shekteýlerdi konstıtýtsııalyq deńgeıde bekitý ǵana.
Bizdiń oıymyzsha, ar-ujdan men qadir-qasıetti qorǵaý, qoǵamdyq tártipti saqtaý sııaqty negizgi quqyqtar konstıtýtsııalyq deńgeıde bekitilýi tıis. Soǵan qaramastan, eń basty qaǵıda ózgerissiz qalady. Sóz bostandyǵyna kepildik beriledi, al tsenzýraǵa tyıym salynady. Árıne, sóz bostandyǵy – qoǵamnyń basty qundylyqtarynyń biri. Sonymen birge, onyń da ózindik quqyqtyq sheńberi bar ekenin túsinýimiz kerek. Bul shekteýler oı-pikirin bildirýge emes, tek qoǵamǵa qaýipti maqsattardy kózdeıtin úgit-nasıhatqa qatysty qoldanylady. Bul másele konstıtýtsııalyq qurylysty kúshtep ózgertýge, ulttyq qaýipsizdikke, kemsitýshilik sıpattaǵy arazdyqty qozdyrýǵa baǵyttalǵan, ne osyndaı áreketterge aıdap salý nemese soǵan ashyq shaqyrý belgileri bar jaǵdaılarǵa ǵana qatysty ekeni belgili, - dedi Úkimet basshysynyń orynbasary.
Onyń sózine qaraǵanda, osyndaı áreketterdiń barlyq belgileri elimizdiń Qylmystyq jáne Ákimshilik quqyqbuzýshylyq týraly kodeksterinde naqty kórsetilgen.
Budan buryn habarlanǵandaı, Kazinform agenttiginiń qazaq jáne orys tilindegi Telegram arnasynda Konstıtýtsııalyq komıssııa otyrysynan mátin translıatsııasy bolady.