Jańa Konstıtýtsııa jobasy memlekettiń jańa rýhyn aıqyndaıtyn tarıhı qujat – Abylaıhan Hangeldıev

ASTANA. KAZINFORM – Jańa Konstıtýtsııa jobasy memlekettiń jańa rýhyn aıqyndaıtyn tarıhı qujat. Mundaı pikirdi Prezıdenttiń «Bolashaq» Halyqaralyq stıpendııasy stıpendıattary qaýymdastyǵy» Keńesiniń múshesi Abylaıhan Hangeldıev bildirdi.

- Jańa Konstıtýtsııa jobasy – bul jaı ǵana mátin emes, ol memlekettiń jańa rýhyn, jańa baǵytyn jáne bolashaqqa degen naqty mindettemesin aıqyndaıtyn tarıhı qujat. Preambýlada alǵash ret «Ádiletti Qazaqstan» jáne «Zań men tártip» qaǵıdattary ashyq ári qatań túrde bekitildi. Bul eki sóz qurǵaq uran emes, konstıtýtsııalyq buıryq sııaqty kúshke ıe. Zań ústemdigi men tártip endi eshqandaı syltaýǵa, eshqandaı «jaǵdaıǵa» jol bermeıtin memlekettiń ózegine aınalady, - dedi ol.

Sonymen birge keńes múshesi adam quqyqtary men bostandyqtaryn múltiksiz saqtaý mindeti áskerı buıryqtaı qatań sózben jazylǵanyna nazar aýdartady.

- Bilim, ǵylym jáne ınnovatsııa memlekettiń basym qundylyqtary retinde tanyldy. Mádenıet ult qaýipsizdiginiń júıesi, ulttyq biregeıliktiń tuǵyry dep ataldy. Tabıǵatqa uqypty qaraý korporatıvtik paıdadan joǵary qoıyldy. Osynyń bári birigip, memleket adam úshin jumys isteıtin, ınstıtýttarǵa súıenetin, tulǵalarǵa emes – júıege negizdelgen Qazaqstan qurý ıdeıasyn tolyq ashady. Shetelde bilim alyp júrgen jyldarda damyǵan elderdiń bári dál osyndaı myzǵymas qundylyqtarǵa súıenip, uzaq merzimdi turaqtylyqqa qol jetkizgenin kórdim. Sondyqtan jańa Konstıtýtsııa jobasyn tolyq qoldaımyn. Bul – Uly dalanyń myńjyldyq tarıhymen sabaqtas, bolashaq urpaq aldyndaǵy jaýapkershiligimizdi aıqyndaıtyn qujat. Ádiletti Qazaqstan tek zań men tártippen ǵana ornaıdy, - dedi Abylaıhan Hangeldıev.

Aıta keteıik, búgin Májilistiń jalpy otyrysynda jańa Konstıtýtsııa jobasyn talqylaý barysynda depýtat Erkin Ábil «Uly dala» uǵymy jańa Konstıtýtsııada tarıhı sabaqtastyqty bekitetinin aıtqan edi.