Jańa Konstıtýtsııa jobasy: Májilis tóraǵasy TúrkPA mıssııasymen pikir almasty
ASTANA. KAZINFORM — Májilis tóraǵasy Erlan Qoshanov Túrki memleketteriniń Parlamenttik Assambleıasynyń jańa Konstıtýtsııa jobasy boıynsha respýblıkalyq referendýmdaǵy halyqaralyq baıqaýshylar mıssııasymen kezdesti. Bul týraly QR Parlamentiniń Májilisi málim etti.
Kezdesýde Erlan Qoshanov aldaǵy referendým el damýynyń jańa kezeńiniń bastalýyn bildiretin tarıhı oqıǵa ekenin atap ótti. Bul rette, jańa Konstıtýtsııa jobasynyń normalary — Memleket basshysy Qasym-Jomart Toqaev prezıdenttiktiń alǵashqy kúnderinen bastap júıeli túrde iske asyryp kele jatqan reformalardyń dáıekti jalǵasy.
— Konstıtýtsııa ashyq túrde jáne halyqpen keńese otyryp daıyndaldy. Árkim óz usynystaryn berýge múmkindik aldy. Búgin biz jańa Konstıtýtsııa azamattarymyzdyń qajettilikteri, tilekteri jáne úmitteri kórinis tapqan Halyqtyq qujat dep senimdi túrde aıta alamyz. Ata zańdy ázirleýdegi Memleket basshysynyń rólin erekshe atap ótý kerek. Prezıdent Konstıtýtsııanyń taraýlarymen, baptarymen jeke ózi jumys istedi, konstıtýtsııalyq komıssııa múshelerimen turaqty túrde kezdesip, qujat jobasyna engen mańyzdy novellalardy usyndy, — dedi Májilis tóraǵasy.
Erlan Qoshanov jańa Konstıtýtsııa adam qundylyqtaryna, ıaǵnı azamattarymyz úshin mańyzdy naqty quqyqtar men kepildikterge baǵyttalǵanyna nazar aýdardy. Sol úshin de bilim berý, ǵylym, ınnovatsııa, mádenıet, adal eńbek jáne barshaǵa teń múmkindikter basty konstıtýtsııalyq qundylyqtarǵa aınaldy. Ata zańnyń ón boıynda «Adam memleket úshin emes, memleket adam úshin» ıdeıasy aıqyn kórinis tapty.
Májilis tóraǵasy eldiń jetekshi qoǵamdyq-saıası kúshterin biriktirgen jańa Konstıtýtsııany qoldaý jónindegi Jalpyulttyq koalıtsııanyń jumysy týraly habardar etti. Koalıtsııa músheleri búkil el boıynsha mıllıondaǵan qazaqstandyqtar qatysqan ondaǵan myń is-shara ótkizdi. Olar barlyq aımaqtaǵy azamattar konstıtýtsııalyq qundylyqtardy qoldaıtynyn jáne eldiń bolashaǵyn sonymen baılanystyratynyn kórdi.
Óz kezeginde TúrkPA mıssııasynyń basshysy, Túrkııa Uly ulttyq jınalysynyń depýtaty Osman Mesten jańa Konstıtýtsııa mazmunymen tanysyp shyqqanyn aıta kelip, ondaǵy biraz novellalardyń progressıvtiligi men jańashyldyǵyna toqtaldy. Qujattyń preambýlasynyń tereń mazmunyna, onda Uly dala halyqtarynyń san ǵasyrlyq ortaq tarıhy kórinis tapqanyna erekshe mán berdi. Sonymen qatar Mıssııa basshysy aldaǵy referendým barysynda barlyq halyqaralyq normalar men standarttar saqtalatynyna senim bildirip, TúrkPA baıqaýshylary uıym qurylǵan sátten bastap túrki elderindegi elektoraldyq is-sharalardyń bárine únemi qatysyp kele jatqanyn atap ótti.
Kezdesýge qatysqan Ázerbaıjannyń Mıllı Májilis depýtaty Malahat Ibragımgyzy, Qyrǵyz Respýblıkasynyń Jogorký Kenesh depýtaty Yrysbek Atajanov jáne TúrkPA Bas hatshysy Ramıl Gasan Qazaqstanda júrip jatqan reformalar eldiń memlekettiligi men demokratııalyq qaǵıdattardy odan ári nyǵaıta túsýine tilektestik bildirdi.
Kezdesý sońynda Májilis tóraǵasy TúrkPA mıssııasynyń múshelerine aldaǵy referendýmǵa baıqaýshy retinde qatysyp jatqandary úshin alǵysyn bildirdi.
Eske sala keteıik, buǵan deıin TúrkPA Qazaqstandaǵy referendýmdy baqylaıtynyn jazdyq.
