Jańa Konstıtýtsııa jobasy qoǵam men bılik arasyndaǵy dıalogty nyǵaıtady – Nuraly Ábishev
ASTANA. KAZINFORM – Jańa Konstıtýtsııa jobasy eldiń saıası, quqyqtyq jáne qoǵamdyq damýyn aıqyndap, azamattardyń memlekettik sheshimderge qatysý múmkindigin keńeıtedi. Bul týraly Túrkistan oblystyq máslıhatynyń tóraǵasy Nuraly Ábishev aıtty.
– Jańa Konstıtýtsııa jobasynyń usynylýy – uzaq jyldar boıy qalyptasqan qoǵam suranysynyń jáne ýaqyt talabynan týǵan zańdy qajettilik. Ata zańymyz táýelsizdiktiń quqyqtyq negizin qalap, memlekettilikti nyǵaıtyp, eldi turaqty damý jolyna shyǵardy. Alaıda ýaqyt óte qoǵam ózgerip, jańa talaptar paıda boldy. Sondyqtan bılik pen halyq arasyndaǵy qarym-qatynasty jańasha sıpattaý qajettiligi týyndady, – dedi ol.
Onyń aıtýynsha, azamattardyń sheshim qabyldaýǵa qatysýy men bılik tarmaqtary arasyndaǵy tepe-teńdiktiń saqtalýy óńir turǵyndary úshin erekshe mańyzdy.
– Túrkistan oblysy – halqy tyǵyz ornalasqan óńirlerdiń biri. Aımaqta jumys isteı otyryp, bılik júıesiniń ashyqtyǵy men keri baılanystyń mańyzyn jaqsy túsinemiz. Jańa Konstıtýtsııa jobasy azamattardyń qoǵamdyq-saıası ómirge belsendi qatysýyna jol ashady. Memlekettik sheshimderdi ázirleý men iske asyrý barysynda halyq pikiri muqııat eskerilmek, – dedi N.Ábishev.
Ol bul bastama óńirler úshin turǵyndardy, qoǵamdyq birlestikterdi, jastar ókilderin jáne kásibı qaýymdastyqtardy el damýy máselelerin talqylaýǵa keńinen tartýǵa múmkindik beretinin atap ótti.
– Halqy kóp Túrkistan oblysynda jastar men jas otbasylardyń úlesi joǵary. Sondyqtan keleshekke degen senimdi nyǵaıtý asa mańyzdy. Ózim de tórt balanyń ákesi retinde jańa jobaǵa usynylǵan ózgeristerge tek kásibı turǵydan emes, bolashaq urpaqtyń ómir súrý jaǵdaıyn oılaıtyn azamat retinde qaraımyn. Bul joba memleket pen qoǵam arasyndaǵy dıalogty nyǵaıtyp, azamattardyń memlekettik máselelerge erte jastan qatysýyna jol ashady, – dedi máslıhat tóraǵasy.
Sondaı-aq ol ózara teńgerimdi ári esep beretin bılik júıesin qurýdyń mańyzyn atap ótti.
– Ókilettikterdiń naqty bólinýi, ókildi organdar róliniń kúsheıýi jáne atqarýshy bıliktiń esepti bolýy óńirlerdiń basqarýdaǵy jaýapkershiligin arttyrady. Bul jergilikti máslıhattardyń tıimdi jumys isteýine, óńir erekshelikteri men halyq suranysyn eskerýge múmkindik beredi, – dedi ol.
Aıta keteıik, 9 aqpan Konstıtýtsııalyq reforma jónindegi komıssııaǵa halyqtan 5000-ǵa jýyq usynys túskenin habarlaǵan edik.