Jańa Konstıtýtsııa jobasy: Qazaqstannyń syrtqy saıasatynyń bastaýlary ózektendirildi
ASTANA. KAZINFORM — Jańa Konstıtýtsııanyń jobasynda Qazaqstannyń halyqaralyq quqyq qaǵıdattary men normalaryn qurmetteıtini, múddeli memlekettermen beıbitshilik pen yntymaqtastyqty, olardyń ishki isine aralaspaýdy, halyqaralyq daýlardy beıbit jolmen sheshýdi kózdeıtin syrtqy saıasat júrgizetini jazyldy. Bul týraly Konstıtýtsııalyq sot tóraǵasynyń orynbasary Baqyt Nurmuhanov Konstıtýtsııalyq komıssııanyń 6-otyrysynda aıtty.
Onyń aıtýynsha, jobada Qazaqstannyń qoldanystaǵy quqyǵy máselelerine arnalǵan konstıtýtsııalyq erejeler naqtylandy. Qazaqstan qatysatyn halyqaralyq sharttardyń respýblıka aýmaǵynda qoldanylý tártibi zańdarda aıqyndalmaq.
− Menshik qatynastaryn retteıtin konstıtýtsııalyq norma tolyqtyryldy. Menshikti paıdalaný qoǵam men memleket ıgiligine qyzmet etýge, qorshaǵan ortaǵa zııany bolmaýǵa, basqa tulǵalardyń quqyqtary men zańmen qorǵalatyn múddelerine nuqsan keltirmeýge tıis. Kommertsııalyq emes uıymnyń shet memleketten, halyqaralyq jáne sheteldik zańdy tulǵadan, shetel azamaty men azamattyǵy joq adamnan alatyn aqsha qarajatynyń qozǵalysy jáne aktıvteri týraly aqparat zańǵa sáıkes ashyq ári qoljetimdi bolýǵa tıis, degen norma qarastyryldy, − dedi Baqyt Nurmuhanov.
Sonymen birge, din memleketten bólek qaǵıdaty bekitildi. Qazaqstan aýmaǵynda dinı uıymdar zańǵa sáıkes áreket etedi jáne olardyń qyzmeti konstıtýtsııalyq qurylys negizderin qorǵaý, ulttyq qaýipsizdikti qamtamasyz etý, qoǵamdyq tártipti, adam quqyqtary men bostandyqtaryn, halyq densaýlyǵy men adamgershilik bolmysyn qorǵaý maqsatynda shektelýi múmkin. Bul erejelerdi basqa ózgeristermen tyǵyz baılanysta qaraý kerek.
− Qazaqstannyń syrtqy saıasatynyń bastaýlary ózektendirildi. Qazaqstan Respýblıkasy halyqaralyq quqyq qaǵıdattary men normalaryn qurmetteıdi, múddeli memlekettermen beıbitshilik pen yntymaqtastyqty, olardyń ishki isine aralaspaýdy, halyqaralyq daýlardy beıbit jolmen sheshýdi kózdeıtin syrtqy saıasat júrgizedi, − dedi spıker.
Aıta keteıik, elordada jańa Konstıtýtsııa jobasy tanystyrylyp jatyr.