Jańa Konstıtýtsııa jobasy qazaq tilinde jatyq jazylǵan – zańger

ASTANA. KAZINFORM – Jańa Konstıtýtsııa jobasy aldymen qazaq tilinde uǵynyqty jazylyp, keıin resmı tilge aýdaryldy. Bul týraly Qazaqstan Zańgerler odaǵynyń tóraǵasy Serik Aqylbaı «Referendým-2026» onlaın marafony barysynda aıtty. 

Onyń sózinshe, jańa Ata zań jobasy jastyń da, jasamystyń da tanymyna saı, túsinikti jazylǵan. Óıtkeni, konstıtýtsııalyq komıssııaynyń 12 otyrysynda, odan bólek kóptegen sektsııalyq otyrysta fılologtar ár áripke basa mán berip, mátinniń saýatty bolýyn qadaǵalaǵan.

– Bizdiń zań tehnıkasy boıynsha da, grammatıkalyq jaǵynan – qaı jaǵynan alyp qarasaq ta, óte jetik jazylǵan. Kimge bolsa da, túsinikti. Máselen, preambýlany bala oqysa da túsinedi. Biraq bastysy tyńdaý emes, oqý kerek. Ár adam zeıin qoıyp otyryp oqysa, kóp nárseni túsinedi, - dedi Serik Aqylbaı. 

Sondaı-aq zańger jańa Ata zań jobasynyń, ásirese, 3-baby aıryqsha kóńilinen shyqqanyn aıtty.

– Jańa Konstıtýtsııa jobasynyń 3-babynda memlekettiń mindetteri kórsetilgen. Eń basty prıntsıp – adamnyń quqyǵyn, ómirin, densaýlyǵyn, qaýipsiz eńbek etý múmkindigin – bárin memleket óz moınyna alyp, kepildik beredi. Eń aldyńǵy orynǵa adam qoıylyp otyr. Al memleket adamǵa qyzmet etip, quqyǵyn qorǵap, kepildik beredi, - dedi Qazaqstan Zańgerler odaǵynyń tóraǵasy. 

Aıta keteıik, buǵan deıin Qazaqstan kóptegen eldiń aldyn orap, Konstıtýtsııaǵa tuńǵysh ret tsıfrlyq quqyq máselesin engizgeni jóninde jazǵan edik.