Jańa Konstıtýtsııa jobasy kásipkerlik pen memleket arasyndaǵy senimdi nyǵaıtady – Oljas Bektenov
ASTANA. KAZINFORM — Premer-mınıstr Oljas Bektenov «Atameken» UKP alańynda munaı-gaz jáne energetıka salasy, taý-ken jáne metallýrgııa ónerkásibi, AÓK bıznes ókilderi, salalyq qaýymdastyqtar músheleri men barlyq óńir sarapshylarynyń qatysýymen kásipkerlikti damytý máseleleri jóninde keńes ótkizdi.
Úkimettiń baspasóz qyzmetiniń málimetinshe, salyq reformalary, bıznesti qoldaý, aqparattyq júıelerdi tsıfrlandyrý syndy basqa da ózekti máselelerge nazar aýdaryldy.
Jıyndy ashqan Premer-mınıstr kásipkerlikti damytý Memleket basshysy aıqyndaǵan basym baǵyttardyń biri ekenin erekshe atap ótti. Bıznes – ekonomıkalyq reformalar júrgizýde basty seriktes, bul jumysta «Atameken» UKP mańyzdy ról atqarady.
- Biz búgin sizdermen elimiz úshin óte mańyzdy, tarıhı mańyzy bar sátte kezdesip otyrmyz. Jarty jyl boıy qoǵamda konstıtýtsııalyq reformany belsendi talqylaý júrip jatyr. Ashyq dıskýssııalar bolyp jatyr. Azamattardan myńdaǵan usynys kelip túsýde jáne olardyń barlyǵy tereń zerdelenip, eskerilip jatyr. Bul – elimizdegi demokratııalyq protsesterdiń aıqyn dáleli. Elimizdiń jańa Konstıtýtsııasynyń jobasy halyqqa usynyldy, basty maqsat – egemendigimizdi, Táýelsizdikti nyǵaıtý. Barlyǵyńyzdy Prezıdentimizdi jáne jańa Konstıtýtsııany qoldaýǵa shaqyramyn. Sizderdiń qaramaqtaryńyzda myńdaǵan azamat jumys isteıdi. Olardyń árqaısysyna reforma mindetterin durys jetkizý mańyzdy, — dep atap ótti Oljas Bektenov.
Jańa Konstıtýtsııa jobasynda Memleket basshysynyń Zań jáne Tártip jappaı ústemdik qurǵan Ádiletti Qazaqstandy qurý týraly baǵdary kásipkerler qaýymyna úlken jaýapkershilik júktep, adal eńbek, kásipke degen qurmet, elge janashyr bolý sııaqty qundylyqtardyń mańyzyn arttyra túsedi. Ádildik pen zańdylyq qaǵıdattaryn konstıtýtsııalyq deńgeıde bekitý senim men uzaqmerzimdi áriptestik orta qalyptastyrady.
Keńes barysynda Prezıdenttiń jańa salyq erejelerin birtindep engizýge qatysty tapsyrmasynyń oryndalýyna nazar aýdaryldy. Qatysýshylar salyq tóleýshiler úshin ótpeli kezeń men salyqtyq ákimshilendirý máselelerin talqylady.
Qazaqstanda kásipkerlerdiń salyqtyq ákimshilendirýdiń jańa sharttaryna qolaıly kóshýin qamtamasyz etý boıynsha sharalar qabyldandy. Osylaısha, Úkimettiń sheshimimen shaǵyn jáne mıkrobıznes jekelegen jaǵdaıdy qospaǵanda, 2026 jylǵy 1 qańtarǵa deıin tekserýlerden, kameraldyq baqylaýdan jáne ákimshilik jaýapkershilikten bosatyldy.
Bıylǵy 1 sáýirge deıin bereshekti tóleý kezinde ósimpuldar men aıyppuldardy esepten shyǵarý erejesi qoldanylady, qyzmetti joıý jáne toqtatý rásimderi qaıta qaraldy.
2026 jyldyń sońyna deıin shaǵyn jáne mıkrobıznes úshin ótpeli kezeń engizildi, qateler úshin ósimpuldar men aıyppuldar alynbaıdy.
Premer-mınıstrdiń orynbasary – ulttyq ekonomıka mınıstri Serik Jumanǵarın bir mezgilde 250 myńǵa deıin salyq tóleýshige qyzmet kórsetý múmkindigi bar Jobalyq keńseniń jumysy týraly baıandady.
Jumys ótinishterdi jedel qaraýmen «biryńǵaı tereze» qaǵıdaty boıynsha qurylǵan.
Sońǵy úsh aptada suranystar aǵynynyń 19,5 myńnan 7,1 myńǵa deıin tómendeýi baıqalady, bul tehnıkalyq protsesterdiń turaqtanǵanyn kórsetedi. «Halyq býhgalteri» aktsııasyna 17 myńnan astam salyq tóleýshi qatysty. Sondaı-aq salyq júıesinde azamattar men bıznesti tirkeýdiń ósýi baıqalǵany atap ótildi. Jyldyń basynan beri 41,2 myńnan astam adam qaıtadan esepke alyndy. Ózin-ózi jumyspen qamtyǵandar úshin jańa rejım buryn esepke alynbaǵan 187,2 myńnan astam adamdy zańdy ortaǵa shyǵardy.
Bıznesti qarjylyq qoldaý sharalary kúsheıtilýde. 2025 jyly qoldanystaǵy baǵdarlamalar sheńberinde jalpy quny 365 mlrd teńge bolatyn 3,4 myńǵa jýyq ShOB jobasy sýbsıdııalandy.
«Atameken» UKP tóralqa tóraǵasy Qanat Sharlapaev memleket pen bıznestiń ózara is-qımylyn nyǵaıtý boıynsha júrgizilip jatqan jumystar týraly habardar etti. Memleket basshysy qoıǵan mindetter sheńberinde «Atameken» UKP orta jáne iri bıznes arasynan ishki ınvestorlardy damytýǵa nazar aýdarady, keńeıtýge jáne jańǵyrtýǵa daıyn jumys istep turǵan kásiporyndardyń ınvestıtsııalyq jobalarynyń pýlyn qalyptastyrýmen aınalysady.
«Atameken» UKP basqarma múshesi – basqarma tóraǵasynyń orynbasary Tımýr Jarkenov arnaıy salyq rejımin qoldanýǵa jáne densaýlyq saqtaý sektoryna salyq salý tásilderin qaıta qaraýǵa baılanysty máselelerdi sheshý joldaryn usyna otyryp, jańa Salyq kodeksiniń erejeleri boıynsha bıznes-qoǵamdastyqtyń ustanymyn aıtty.
Sondaı-aq qazaqstandyq taýar óndirýshilerdiń tizilimin iske qosý barysy qaraldy. Ónerkásip jáne qurylys mınıstri Ersaıyn Naǵaspaev búgingi tańda júıege 5 608 kompanııa avtorızatsııalanǵanyn, 13 533 ótinim berilgenin baıandady. Basqarma múshesi – «Atameken» UKP basqarma tóraǵasynyń orynbasary Nursultan Shoqanov óz kezeginde jańa tsıfrlyq júıege úzdiksiz kóshý úshin qoldanystaǵy ındýstrııalyq sertıfıkattardyń 1 924 ıesi avtomatty túrde tizilimge kóshirilgenin atap ótti. Oǵan kún saıyn 100-ge tarta óndirýshi kiredi.
Bıznes-qoǵamdastyq atynan «Almaty boıaýlary» JShS dırektory Rımma Salyqova, «Qazelektromash» JShS dırektory Vıtalıı Raspopın usynystar men suraqtar qoıdy. Atap aıtqanda, ShOB-pen ózara is-qımyldy, memlekettik satyp alý praktıkasyn jáne salalyq talaptardy eskere otyryp, salyqtyq ákimshilendirýdiń jekelegen aspektilerin retteý qajettiligi aıtyldy. Sondaı-aq kásiporyndardy óndiristik tsıkl deńgeıi men aýqymy boıynsha sanattarǵa bólýdi engizý, memlekettik qoldaý sharalary men memlekettik tapsyrysty lokalızatsııalaý jáne ınvestıtsııalaý deńgeıine baılanystyrý, sondaı-aq Tizilimnen ónimderdi paıdalanýdy naqty ári ádil tsıfrlyq baqylaýdy qamtamasyz etý arqyly Qazaqstandyq taýar óndirýshiler tizilimin jetildirýge qatysty odan ári jumys boıynsha usynys aıtyldy.
Premer-mınıstr bıznestiń aıtylǵan bastamalaryna pikir bildirip, memlekettik organdarǵa «Atameken» UKP-men birlesip usynystardy jan-jaqty pysyqtaýdy jáne naqty nátıjeni qamtamasyz etýdi tapsyrdy. Sheshimder turaqty ósýdi qoldaý, naqty sektordy nyǵaıtý, eksporttyq múmkindikterdi keńeıtý jáne jumys oryndaryn ashý boıynsha oń ekonomıkalyq nátıje berýi kerektigi atap ótildi.
Aıta ketelik keshe Konstıtýtsııalyq reforma jónindegi komıssııanyń VIII otyrysy ótken edi.