Jańa Konstıtýtsııa jobasy Good Governance qaǵıdattaryn ınstıtýtsıonaldyq turǵyda kúsheıtedi
ASTANA. KAZINFORM – Prezıdent janyndaǵy Memlekettik basqarý akademııasy Basqarý ınstıtýtynyń dırektory Quralaı Sadyqovanyń pikirinshe, Qazaqstandaǵy konstıtýtsııalyq reforma memlekettik qurylymnyń quqyqtyq negizin túbegeıli jańartýǵa baǵyttalǵan.
Sarapshy jańa Konstıtýtsııa jobasyndaǵy eń mańyzdy tustardyń qataryna Ata zańnyń preambýlasyn jańartý men jańa bólimderdiń engizilýin, azamattardyń quqyqtary men bostandyqtarynyń keńeıýin, sondaı-aq ınstıtýtsıonaldyq jańashyldyqtardy jatqyzdy. Atap aıtqanda, konsýltatıvtik organ retinde Halyq keńesin qurý jáne konstıtýtsııalyq baqylaýdyń táýelsiz organy retindegi Konstıtýtsııalyq sottyń mártebesin kúsheıtý osy ózgeristerdiń qatarynda.
– Búginde júzege asyrylyp jatqan aýqymdy konstıtýtsııalyq reforma memlekettik qurylym júıesin tereń transformatsııalaýǵa baǵyttalǵan. Konstıtýtsııa mátininiń 84 paıyzynyń ózgertilýi men tolyqtyrylýy ony qaıta paıymdaý emes, jańa Konstıtýtsııa qabyldaý dep qarastyrýǵa negiz beredi jáne konstıtýtsıonalızm doktrınasy turǵysynan qoǵamdyq sharttyń mánin materıaldyq ta, formaldyq ta qyrynan tolyq qamtıdy. Menińshe, bul konstıtýtsııalyq jańalyqtar Good Governance – memleket pen qoǵamnyń tıimdi ınstıtýttaryn damytýǵa baǵdarlanǵan basqarý qaǵıdattary júıesiniń elementterin ınstıtýtsıonaldyq turǵyda kúsheıtedi, – dep pikir bildirdi Quralaı Sadyqova.
Onyń aıtýynsha, konstıtýtsııalyq ózgeristerdiń mańyzdy bóligi quqyqtyq tártipti nyǵaıtýǵa, memlekettik ınstıtýttardyń ashyqtyǵy men eseptiligin arttyrýǵa, sondaı-aq jańartylǵan zańnamalyq arhıtektýra arqyly azamattardyń saıası úderisterge qatysý aıasyn keńeıtýge baǵyttalǵan.
– Jańa Konstıtýtsııa jobasynda adamdy jáne onyń quqyqtaryn memlekettiń eń joǵary qundylyǵy retinde taný negizgi qaǵıdat bolyp qala beredi. Bul basqarýdyń adamǵa baǵdarlanǵan modelin aıqyn kórsetedi, – dep esepteıdi sarapshy.
Bul, eń aldymen, adam men azamattyń quqyqtary men bostandyqtaryn eń joǵary, absolıýtti ári myzǵymas konstıtýtsııalyq qundylyq retinde bekitýge, jeke tulǵanyń quqyqtyq qorǵalýyn keńeıtýge, bıliktiń ashyqtyǵy men eseptiligin arttyrýǵa, sondaı-aq memlekettik ınstıtýttar men azamattyq qoǵam arasynda turaqty dıalog ornatýǵa arnalǵan tetikterdi qalyptastyrýǵa qatysty.
Aıta keteıik, AMANAT partııasy jańa Konstıtýtsııa jobasyna qoldaý bildirdi.