Jańa Konstıtýtsııa jobasy eńbek adamynyń múddesine saı – sarapshy

ASTANA. KAZINFORM – QR Kásipodaqtar federatsııasynyń tóraǵasy Satybaldy Dáýletalın Konstıtýtsııalyq reformalar jónindegi komıssııanyń onynshy otyrysynda jańa Ata zań jobasynyń eńbek adamy úshin mańyzy qandaı ekenin túsindirdi.

Dáýletalınniń aıtýynsha, Jańa Konstıtýtsııa jobasy eńbek ujymdarynda, óńirler men kásiporyndarda keńinen talqylanǵan.

– Adamdar jalaqy, eńbek qaýipsizdigi, jumysynan aıyrylyp qalý qorqynyshy men balalarynyń bolashaǵy týraly búkpesiz pikirlerimen bólisti. Osy talqylaýlar nátıjesinde Kásipodaqtar federatsııasy jańa Konstıtýtsııa jobasyn mazmuny jaǵynan qoldady. Óıtkeni bul joba negizinen eńbek adamynyń oıyna, kútken úmiti men múddesine saı, – dedi ol.

Sondaı-aq memlekettiń áleýmettik sıpaty men «Ádiletti Qazaqstan» qaǵıdatynyń ólshemderi týraly aıtyldy. Federatsııa tóraǵasy Ata zańnyń birinshi babynda Qazaqstannyń áleýmettik memleket retinde bekitilýi eńbek adamyna baǵyttalǵan mańyzdy belgi ekenin atap ótti.

– Memleket esep pen kórsetkishke emes, tańnan keshke deıin eńbek etip, eldiń berekesin ustap turǵan adamǵa súıenip qurylatynyn aıqyn jetkizetin uǵym. Memleket eńbek etý quqyǵyn jarııalap qana qoımaı, jumyspen qamtýǵa, qaýipsiz eńbek jaǵdaıyn jasaýǵa mindet alady. Bul – mańyzdy betburys. Eńbek endi adamnyń jeke táýekeli emes, laıyqty ómirdiń tiregi retinde tanylady, – dedi federatsııa tóraǵasy.

Aıta keteıik, buǵan deıin Konstıtýtsııa jobasynynyń 9-babynda «teń» sózi «qatar» dep ózgertilgen edi.