Jańa Konstıtýtsııa týraly sheshim qabyldaýymyz qajet — Erkin Ońǵarbaev

ASTANA. KAZINFORM — Konstıtýtsııalyq reforma jónindegi komıssııanyń búgingi otyrysynda Konstıtýtsııalyq sot sýdıasy Erkin Ońǵarbaev Qazaqstannyń jańa Konstıtýtsııasyn qabyldaý usynyldy. 

 — Komıssııa músheleri sóılegen sózderinde Qazaqstan Respýblıkasynyń Konstıtýtsııasyna ózgerister men tolyqtyrýlar týraly emes, jańa Konstıtýtsııa týraly aıtý qajet degen pikir aıtyldy. Quqyqtaný salasynda uzaq jyl boıy ǵylymı zertteýlermen aınalysyp kele jatqan quqyq professory retinde atalǵan ustanymdy qoldaǵym keledi, — dedi ol.

Sýdıa bul paıymyn zańnyń talaby retinde sıpattady.

— Qoldanystaǵy zańnama boıynsha normatıvtik-quqyqtyq aktige jartysynan asatyn kólemde ózgerister men tolyqtyrýlar engizgen kezde onyń jańa redaktsııasy qabyldanady. Qazirgi ýaqytta Konstıtýtsııanyń 77 babyna ózgerister men tolyqtyrýlar engizý kózdelip otyr. Bul Konstıtýtsııa mátininiń 80 paıyzynan astamyn qamtıdy. Konstıtýtsııa — memlekettiń Ata zańy, normatıvtik-quqyqtyq aktilerdiń negizgi túrine jatady. Osyǵan baılanysty biz qoldanystaǵy zańnamaǵa sáıkes Qazaqstan Respýblıkasynyń jańa Konstıtýtsııasy týraly sheshim qabyldaýymyz qajet, — dedi Erkin Ońǵarbaev. 

Eske salaıyq, Konstıtýtsııalyq komıssııanyń V otyrysyn Kazinform agenttiginiń resýrstarynan kórýge bolady. 

Ótken aptada Konstıtýtsııalyq komıssııanyń alǵashqy otyrysy ótip, bir palataly «Quryltaıdyń» fýnktsııasy men quramy, vıtse-prezıdent laýazymynyń memlekettik bıliktegi orny, zań shyǵarý bastamasyn kóterýge haqyly «Halyq keńesiniń» quzyreti qandaı bolatyny aıtylǵan edi.