ERG ujymy referendýmdy qoldaıdy
ASTANA. KAZINFORM – ERG kompanııalarynyń ókilderi jańa Konstıtýtsııaǵa arnalǵan referendým ótkizýge qatysty pikir bildirdi.
Atap aıtqanda, ERG dırektorlary keńesiniń tóraǵasy, bas atqarýshy dırektory Shýhrat Ibragımov, sondaı-aq «Qazhrom» TUK» AQ, «Qazaqstan alıýmınııi» AQ, «Qazaqstan elektrolız zaýyty» AQ, «Sokolov-Sarybaıskoe taý-ken óndiristik birlestigi» AQ, «Shubarkól kómir» AQ, «Evroazıttyq energetıkalyq korporatsııasy» AQ, «Qashar keni» AQ jáne «ERG Service» JShS ókilderi málimdeme jasady.
— Elimizdiń ár tarapyndaǵy alýan túrli maman ERG-diń myńdaǵan eńbek ujymyna birikken. Bizdi tek ortaq is qana emes, eńbektiń ortaq qundylyqtary da biriktiredi. Ónerkásip úshin bul — abstraktili túsinik emes. Jaýapkershilik, kásibı biliktilik pen qaýipsizdik — nátıjege jeteleıtin kún saıynǵy eńbek, — delingen habarlamada.
Qazaqstannyń jańa Konstıtýtsııasy adam men onyń quqyqtaryn memlekettik saıasattaǵy ortalyq qundylyq retinde aıqyndap, osyǵan erekshe ekpin túsiredi. Kompanııa úshin munyń tikeleı máni bar.
— Eńbek etý quqyǵy burynǵydan da ornyqty konstıtýtsııalyq negizge ıe boldy. Sonymen qatar jumys ornynyń sapasy, eńbek jaǵdaıy men áleýmettik turaqtylyq júıeli basymdyqqa aınalǵan ekonomıkalyq kózqaras nyǵaıtyldy. Qaýipsiz eńbek etý quqyǵynyń konstıtýtsııalyq turǵyda bekitilýi de mańyzdy. Eńbek qaýipsizdigi tek korporatıvtik mindet qana emes, memleket pen jumys berýshilerdiń tikeleı mindetine aınalyp otyr, — delingen kompanııa málimdemesinde.
Kompanııa málimetinshe, jańa Konstıtýtsııada tabıǵatty qorǵaý, jerge barynsha uqypty ári janashyr kózqaras tanytý — memleket pen azamattardyń jaýapkershiligi ekeni aıqyn jazylǵan.
— Áleýmettik kepildikter — eń tómengi eńbekaqy, zeınetaqymen qamsyzdandyrý, áleýmettik osal toptardy qoldaý — burynǵydan da ornyqty sıpat aldy. Bul árbir eńbek adamyna qajetti turaqtylyq seziminiń negizi. Jańa Konstıtýtsııa ónimdilik, áleýmettik jaýapkershilik pen adamgershilik ustanym arasyndaǵy zamanaýı tepe-teńdikke negizdelgen. Endigi jerde onyń áleýmettik qana emes, ekonomıkalyq ólshemderi de aıqyn, — deıdi.
Instıtýtsıonaldyq ortanyń turaqtylyǵy men boljamdylyǵy bıznestiń damýyna tikeleı áser etedi.
— Ekonomıkany, ınvestıtsııalardy jáne óndiristi jańǵyrtý, jańa jumys oryndaryn ashý úshin eń aldymen memlekettik júıeniń uzaq merzimdi ornyqtylyǵy qajet.
Ekonomıkalyq jaǵdaı turaqty ári barshaǵa túsinikti bolǵan jaǵdaıda kásipkerler ósimge, keńeıýge jáne jańa sheshimder engizýge umtylady. Mundaı ortadan kompanııalar, qyzmetkerler jáne jalpy memleket utady. Bilim berý, ǵylym men ınnovatsııalardy basym baǵyttar retinde belgileýdiń de mańyzy zor. Jahandyq básekelestik jaǵdaıynda bilim, tehnologııalar men adam kapıtaly damýdyń sheshýshi resýrsyna aınalyp otyr. Konstıtýtsııada ǵylym, ǵylymı shyǵarmashylyq, tehnologııalyq ilgerileý, ekonomıkany jańǵyrtý jáne jańa salalardy qalyptastyrýdyń uzaq merzimdi negizi retinde tanylǵan, — delingen pikirde.
Búginde ónerkásip, tehnologııalar men ǵylym arasyndaǵy ózara baılanys burynǵydan da aıqyn. Indýstrııanyń básekege qabilettiligi ınnovatsııalarǵa, ınjenerlik sheshimderge jáne eldiń ǵylymı áleýetine tikeleı baılanysty.
— Jańa Konstıtýtsııa memlekettiń uzaq merzimdi ornyqtylyǵy úshin adam kapıtalyn damytýdy strategııalyq túpqazyqqa aınaldyrady. Bul jaǵdaıda referendým — tek formaldy rásim emes. Bul azamattardyń eldiń bolashaq qurylymyn aıqyndaýǵa tikeleı qatysý tetigi. ERG-diń myńdaǵan eńbek ujymy Qazaqstannyń jańa Konstıtýtsııasyna qatysty referendým ótkizýdi qoldaıdy jáne barshańyzdy daýys berýge shaqyrady. Biz búgin qabyldaıtyn sheshimder erteńgi keleshegimizdi qalyptastyrady, — deıdi kompanııa ókilderi.
