Jańa Konstıtýtsııa – tsıfrlyq qaýipsizdik kepili: Zańger mańyzdy ózgeristerdi túsindirdi
ASTANA. KAZINFORM – Almatyda qalalyq qoǵamdyq koalıtsııa músheleri «Qazgıdromet» ortalyǵynyń ujymymen kezdesip, Konstıtýtsııaǵa engiziletin ózgeristerdi talqylady. Basqosýda azamattardyń tsıfrlyq keńistiktegi quqyqtary men jeke derekterin qorǵaý máselesine erekshe nazar aýdaryldy. Bul týraly ál-Farabı atyndaǵy QazUÝ zań fakýltetiniń dekany, zańger Ýálıhan Ahatov «Jibek Joly» telearnasynyń «Búgin.LIVE» baǵdarlamasynda málimdedi.
Kezdesý barysynda sarapshylar Ata Zań jobasyna alǵash ret azamattardyń vırtýaldy álemdegi qaýipsizdigin qamtamasyz etetin normalar engizilgenin atap ótti.
– Qazir qyzmetimizdiń basym bóligi tsıfrlyq formatqa kóshti. Máselen «Qazgıdromet» ortalyǵynyń ózi klımattyq derekterdi tsıfrlyq júıeler arqyly jınap, óńdeıdi. Sondyqtan adamdardyń tsıfrlyq quqyǵy, ıaǵnı jeke qaýipsizdigine qatysty jańa normalardyń enýi óte mańyzdy. Aıta ketetin jaıt, mundaı normalar kóptegen damyǵan memleketterdiń konstıtýtsııasynda áli kúnge deıin joq, – dedi zańger Ýálıhan Ahatov.
«Qazgıdromet» ortalyǵynyń Almaty bólimshesinde 70-ten astam maman jumys isteıdi. Olar tabıǵı qubylystardy baqylap qana qoımaı, memlekettik mańyzy bar aqparattyq júıelerdiń qaýipsizdigine de jaýap beredi.
Sarapshylardyń pikirinshe, konstıtýtsııalyq deńgeıdegi kepildikter derbes derekterge qol suǵylmaýyna, kıberqylmysqa qarsy turýǵa múmkindik beredi.
– Usynylyp otyrǵan ózgerister árbir azamattyń tsıfrlyq keńistiktegi quqyǵyn qorǵaýdy nyǵaıtady. Bul tek tehnıkalyq emes, eń aldymen zańdyq kepildik. Azamattardyń jeke derekteriniń qaýipsizdigi memleket tarapynan basty nazarǵa alynýy demokratııalyq qoǵamnyń damýyna serpin beredi, – dep túıindedi zańger.
Eske sala keteıik, Almatyda 15 naýryzda qoǵamdyq kólik tegin bolady.
