Jańa Konstıtýtsııa referendýmyna qarajat Úkimettiń rezervinen bólinedi
ASTANA. KAZINFORM – Qarjy vıtse-mınıstri Dáýren Temirbekov aldaǵy referendýmǵa bólinetin qarjatqa qatysty pikir aıtty.
- Qajet soma áli belgisiz. Ony búgin tústen keıin nemese erteń jarııalaı alamyz. Bul rette, Ortalyq saılaý komıssııasynyń bıýdjettik ótinimin kútip otyrmyz, - dedi D. Temirbekov Senatta tilshiler suraǵyna jaýap bere otyryp.
Sonymen qatar jýrnalıster osyǵan deıingi referendýmǵa qaraǵanda qarajat qanshalyqty artyq bólinýi múmkin ekenin surady.
- Halyq sanynyń óskenin jáne ınflıatsııa deńgeıin eskere otyryp, shyǵyn birshama joǵary bolady dep oılaımyn. Bizde halyq sany kóbeıgennen keıin, saılaý ýchaskeleri de kóbirek ashylady. Sondyqtan bólinetin qarajat artýy yqtımal. Qarajat Úkimettiń rezervinen qarastyrylady, - dedi vıtse-mınıstr.
Budan buryn habarlanǵandaı, Memleket basshysy 2026 jylǵy 15 naýryzda respýblıkalyq referendým ótkizý týraly Jarlyqqa qol qoıdy.