Jańa Konstıtýtsııa memlekettiń negizgi qundylyqtaryn saqtap, odan ary damytýǵa múmkindik beredi — Serik Aqylbaı
ASTANA. KAZINFORM — Jańa Konstıtýtsııa memlekettiń negizgi qundylyqtaryn saqtap, olardy jınaqtalǵan tájirıbe negizinde odan ary damytýǵa múmkindik beredi. Bul týraly Konstıtýtsııalyq reformalar jónindegi komıssııanyń otyrysynda Qazaqstan zańgerler odaǵynyń tóraǵasy Serik Aqylbaı aıtty.
— Jobaǵa ulttyq normalardyń aýqymdy kólemi engizildi ári bul normalar qosalqy sıpatta emes, konstıtýtsııalyq qurylystyń irgeli negizderin qamtıdy. Munda áńgime jekelegen baptarǵa túzetýler engizýge qatysty emes. Ózgerister Prıambýladan bastaý alyp, memlekettiń qundylyq baǵdarlamalaryn naqtylaıdy. Quqyqtyq jáne zaıyrly memleket qaǵıdattaryn bekitedi. Bılik tarmaqtary arasyndaǵy ókilettikterdi qaıta bóledi. Sonymen qatar jańa ınstıtýtsıonaldyq qurylym qalyptastyrady. Onyń ishinde bir palataly Parlament Halyq keńesi, Úkimet qyzmetiniń, sot júıesi men quqyq qorǵaý tetikteriniń jańartylǵan modelderi qarastyrylǵan. Túptep kelgende bul memlekettik basqarý júıesiniń búkil qurylymyn keshendi ári túbegeıli qaıta qaraýdy bildirdi, — dedi odaq tóraǵasy.
Sondyqtan Serik Aqylbaı usynylyp otyrǵan ózgeristerdiń aýqymyn, tereńdigin eskere otyryp, qoldanystaǵy Konstıtýtsııanyń jańa redaktsııasy týraly emes, is júzinde jańa Konstıtýtsııa týraly aıtý oryndy dep sanaıtyndyǵyn aıtty.
— Shynynda da bılikti uıymdastyrý negizderi ózerip, jańa ınstıtýttar qalyptastyrylyp, memlekettiń bazalyq qaǵdıattary qaıta qaralǵan kezde bul eldiń konstıtýtsııalyq damýynyń sapaly jańa kezeńge ótkenin kórsetedi. Meniń oıymsha, jańa qadam obektıvti turǵyda zańdy ári ýaqytyly. Qoldanystaǵy Konstıtýtsııa memlekettigimizdiń qalyptasýy men turaqtylyǵyn qamtamasyz etip, mańyzdy tarıhı ról atqardy. Alaıda, búgingi tańda memleket pen qoǵam jańa syn-qaterlerge, sondaı-aq basqarý tıimdiligine, quqyqtyq aıqyndyqqa, adam quqyqtaryn qorǵaýǵa qoıylatyn joǵary talaptarǵa tolyp otyr, — dedi ol.
Onyń paıymynsha, osyndaı jaǵdaıda jańartylǵan, júıeli túrde ázirlengen Ata zań eldiń odan ar damýynyń qajetti quraly sanalady.
— Jańa Konstıtýtsııa memlekettiń negizgi qundylyqtaryn saqtap, olardy jınaqtalǵan tájirıbe negizinde odan ary damytýǵa múmkindik beredi. Bul quqyqtyq aıqynsyzdyqty joıýǵa, zańnamanyń úılesimdiligin arttyrýǵa jáne azamattardyń memleketke degen senimin nyǵaıtýǵa jaǵdaı jasaıdy, — dedi Serik Aqylbaı.
Aıta keteıik, Konstıtýtsııaǵa qylmystyq protseste prokýror men advokattyń mártebesin teń etetin norma engizilmek.