Jańa Konstıtýtsııa memlekettilikti odan ári nyǵaıtatyn saıası júıe qalyptastyrýǵa múmkindik beredi – Áshimbaev

— Ózderińizge belgili, qazir biz memlekettiń taǵdyryn, eldiń erteńin aıqyndaıtyn tarıhı kezeńde turmyz. Prezıdentimiz Qasym-Jomart Kemeluly Toqaevtyń bastamasymen sońǵy jyldarda aýqymdy jańǵyrtýlardy júzege asyrdyq. Konstıtýtsııalyq reforma osy júıeli ózgeristerdiń dáıekti jalǵasy. Basty maqsat — Táýelsizdikti kúsheıtý, memlekettilikti nyǵaıtý jáne azamattardyń ómir súrý sapasyn arttyrý. Jalpy, qazir búkil álem jańa kezeńge qadam basyp jatqanyn kórip otyrmyz. Ekonomıka, tehnologııa, qaýipsizdik júıesi jáne halyqaralyq qatynas salalary túbegeıli ózgerýde. Bul úderister bizden strategııalyq baǵdarymyzdy aıqyndap alýdy talap etýde, - dedi Senat spıkeri.

Osy oraıda palata tóraǵasy jańa Konstıtýtsııa, eń aldymen, jańa syn-qaterlerge berilgen jaýap ekenin basa aıtty.

— Bul — jahandyq turaqsyzdyq jaǵdaıynda eldiń turaqty damýyn qamtamasyz etetin asa mańyzdy sheshim. Sonymen qatar, jańa Konstıtýtsııa halyqqa qyzmet etetin jáne memlekettilikti odan ári nyǵaıtatyn saıası júıe qalyptastyrýǵa múmkindik beredi. Sol arqyly bılik organdarynyń halyq aldyndaǵy jaýapkershiligi jáne tıimdiligi artady. Osylaısha, saıası júıe zamanaýı talaptarǵa sáıkes pármendi ári naǵyz halyq únin estıtin qurylym retinde qalyptasady, - dedi Máýlen Áshimbaev.

Onyń paıymynsha, konstıtýtsııalyq reforma azamattardyń quqyqtary men múddelerin qamtamasyz etýge negizgi basymdyq beredi.

— Jańa Ata Zań jobasynda adam, onyń ómiri, quqyǵy jáne bostandyǵy memlekettiń eń joǵary qundylyqtary retinde aıqyndalyp otyr. Senatorlardyń óńirlerge saparlarynyń qorytyndysy halyqtyń jańa Konstıtýtsııa jobasyn qoldaıtynyn kórsetti. Sondaı-aq, palata deńgeıinde ótkizilgen is-sharalarda elimizdegi jetekshi sarapshylar, qoǵam belsendileri, jastar da oń pikirlerin bildirdi. Jalpy, Senat Prezıdentimizdiń bastamasymen júzege asyrylyp jatqan barlyq reformany árqashan qoldaıdy. Qazirgideı mańyzdy sátte de bárimiz Memleket basshysynyń saıasaty aıasynda birigip, judyryqtaı jumylyp áreket etýge tıispiz. Shyn máninde, bul — ortaq jaýapkershilik kezeńi. Árbir azamat, árbir memlekettik organ jańa Konstıtýtsııada belgilengen maqsattardy júzege asyrýǵa atsalysýy qajet. Sol sebepti, barsha qazaqstandyqty 15 naýryzda ótetin jalpyulttyq referendýmǵa belsendi qatysýǵa shaqyramyz. Bul — bizdiń damyǵan memleket ári bolashaǵy jarqyn qoǵam ekenimizdi kórsetedi. Osy jolda halqymyz aýyzbirshiliktiń bıiginen kórinedi dep senemin, - dedi Senat spıkeri.

Eske sala keteıik, osyǵan deıin Senat Konstıtýtsııa jobasy erejelerin túsindirý úshin depýtattardyń óńirlerge saparyn qorytyndylaıtynyn habarlaǵan edik.