Jańa Konstıtýtsııa memlekettik basqarýdyń jańa kezeńine jol ashty — sarapshy
ASTANA. KAZINFORM — 1 shildeden bastap kúshine engen jańa Konstıtýtsııa elimizdiń dástúrli memlekettik basqarý formasyn azamattardyń quqyqtaryn qorǵaýdyń jáne turaqty damýdyń zamanaýı qaǵıdattarymen ushtastyrady. Bul týraly «Ekonomıkalyq zertteýler ınstıtýty» AQ Turaqty damý maqsattary jónindegi hatshylyqtyń dırektory Baqytgúl Qambar málimdedi.
Onyń aıtýynsha, Konstıtýtsııa — kez kelgen memlekettiń damýynyń irgetasy. Sondyqtan jańa Ata zańnyń kúshine enýi Qazaqstan úshin tarıhı mańyzy bar jańa kezeńniń bastalǵanyn bildiredi.
— Jańa Konstıtýtsııany Qazaqstan qoǵamynyń jańa damý satysyna kóshýine negiz bolatyn mańyzdy qujat dep baǵalaýǵa bolady. Ol elimizdiń saıası damýynyń tarıhı erekshelikterin qazirgi memlekettik basqarý qaǵıdattarymen jáne zaman talabymen úılestirip otyr, — dedi sarapshy.
Sarapshy Quryltaı men Halyq keńesi sııaqty ınstıtýttardyń Konstıtýtsııada kórinis tabýy qazaq memlekettiliginiń tarıhı dástúrleriniń búgingi basqarý júıesinde jalǵasqanyn aıtady. Sebebi bul qujat memlekettik basqarý júıesin jańǵyrtýǵa ǵana jasalǵan qadam emes.
Sonymen qatar Baqytgúl Qambar jańa Konstıtýtsııada tsıfrlyq dáýir zamanynda adam quqyqtaryn qorǵaýǵa qatysty normalarǵa erekshe mán berilgenin atap ótti. Onyń aıtýynsha, bul azamattardyń tsıfrlyq keńistiktegi quqyqtaryn qorǵaýdy kúsheıtetin mańyzdy jańashyldyqtardyń biri.
— Konstıtýtsııada ár azamattyń jeke ómirine qol suǵylmaýyna, jeke jáne otbasylyq qupııasynyń saqtalýyna kepildik berilgen. Sondaı-aq tsıfrlyq tehnologııalardy paıdalaný arqyly derbes málimetterdiń zańsyz jınalýyna, óńdelýine, saqtalýyna jáne qoldanylýyna jol berilmeıtini naqty kórsetilgen, — dedi Baqytgúl Qambar.
Onyń aıtýynsha, bul norma Qazaqstannyń tehnologııa qarqyndy damyp, tsıfrlandyrý úderisi jedeldep jatqan kezeńde eldiń quqyqtyq negizin zaman talabyna saı qalyptastyryp jatqanyn kórsetedi.
Jańa Konstıtýtsııanyń basty erekshelikteriniń biri — saıası máselelermen qatar áleýmettik-ekonomıkalyq jáne ekologııalyq damý basymdyqtarynyń da birtutas qamtylýy.
— Jańa Konstıtýtsııa tek saıası ózgeristerdi ǵana emes, áleýmettik-ekonomıkalyq jáne ekologııalyq talaptardy da qamtıdy. Bul álemdegi zamanaýı damý úrdisterine saı ári elimizdiń ornyqty damýyna berik negiz qalaıdy, — dedi sarapshy.
Onyń aıtýynsha, aldaǵy ýaqytta memleketti odan ári nyǵaıtyp, halyqtyń ómir súrý sapasyn jaqsartýdyń basty tetigi turaqty damý bolýǵa tıis.
Sonymen qatar sarapshy Konstıtýtsııada kózdelgen reformalardyń nátıjesi Ata zańda bekitilgen qaǵıdalar men normalardyń qanshalyqty júıeli ári tıimdi júzege asyrylatynyna baılanysty bolatynyn atap ótti.
Eske sala keteıik, buǵan deıin, Halyq keńesine zań jobalaryn bastamashylyq etý jáne respýblıkalyq referendým ótkizýdi usyný quqyǵy beriletinin habarlanǵan edik.
