Jańa Konstıtýtsııa kúshine endi — sarapshy negizgi ózgeristerge toqtaldy
ASTANA. KAZINFORM — Búgin jalpyhalyqtyq referendýmda qabyldanǵan Qazaqstan Respýblıkasynyń jańa Konstıtýtsııasy resmı túrde kúshine endi. QR Prezıdenti janyndaǵy Qazaqstannyń strategııalyq zertteýler ınstıtýtynyń dırektory Jandos Shaımardanov jańa Konstıtýtsıaınyń mańyzy men onyń qoǵamdyq-saıası júıege áserin taldady.
Sarapshynyń aıtýynsha, jańa Konstıtýtsııanyń basty ereksheligi onyń qabyldaný kezeńinde jatyr. Qujat jasalý barysynda-aq memlekettik organdar men ǵylymı qoǵamdastyqtyń, saıası partııalar men azamattyq qoǵam ınstıtýttarynyń kúsh-jigeri biriktirilgen edi.
— Bul qurylymdar ǵylym ókilderin, memlekettik organdardy, depýtattyq korpýsty, saıası partııalardy, azamattyq qoǵam ınstıtýttaryn jáne sarapshylar qaýymdastyǵyn biriktirdi. Azamattardan kelip túsken myńdaǵan usynys qujattyń sońǵy redaktsııasyn ázirleý barysynda jan-jaqty qarastyryldy. Mundaı tásil jańa Konstıtýtsııanyń qoǵamdyq legıtımdiligin kúsheıtip, elimizdegi konstıtýtsııalyq qurylys ashyq dıalog pen keń qoǵamdyq kelisim qaǵıdattaryna negizdeletinin aıqyn kórsetti, — dedi ol.
Dırektor jańa Konstıtýtsııanyń mańyzy ınstıtýtsıonaldyq ózgerister sheńberinen áldeqaıda keń ekenin atap ótti.
— Qujat memlekettiliktiń jańa modeliniń qundylyqtyq negizin aıqyndaıdy, munda basty oryn adamǵa, onyń quqyqtary men bostandyqtaryna, qadir-qasıetine beriledi. Bul qaǵıdattyń endi tek saıası deklaratsııa retinde emes, memlekettik saıasattyń mazmunyn aıqyndaıtyn naqty konstıtýtsııalyq norma retinde bekitildi, — deıdi Jandos Shaımardanov.
Sonymen qatar Ata Zańda konstıtýtsııalyq qundylyqtardyń jańa júıesi qalyptasqan. Memlekettik egemendik, aýmaqtyq tutastyq, ýnıtarlyq qurylym jáne memlekettiń zaıyrly sıpaty sııaqty dástúrli qaǵıdattarmen qatar, ádilettilik, zań men tártip, áleýmettik yntymaqtastyq, etnosaralyq jáne konfessııaaralyq kelisim sekildi qundylyqtar da erekshe mańyzǵa ıe boldy.
Sondaı-aq ol eldiń strategııalyq damý resýrstaryn túsinýdegi tásildiń túbegeıli ózgergenin de atap ótti. Buǵan deıin negizgi nazar dástúrli túrde tabıǵı resýrstarǵa aýdarylsa, jańa Konstıtýtsııa bilim berý, ǵylym jáne ınnovatsııalar arqyly adamı kapıtaldy damytýdy basym baǵyt retinde bekitedi. Jańa Ata Zań qazirgi tehnologııalyq syn-qaterlerge beıimdelgen.
— Konstıtýtsııalyq deńgeıde alǵash ret azamattardyń tsıfrlyq ortadaǵy quqyqtaryn qorǵaý kepildikteri bekitildi. Bul tsıfrlandyrýdy jeke qaýipsizdikti qamtamasyz etýdiń jáne konstıtýtsııalyq quqyqtardy qorǵaýdyń jańa tetikterin talap etetin quqyqtyq úderis retinde túsinýdiń kórinisi, — dep tolyqtyrdy ol.
Jandos Shaımardanov Qazaqstannyń konstıtýtsııalyq damýy sapalyq turǵydan jańa kezeńge ótkenin aıtty.
— Jalpyhalyqtyq referendýmda qabyldanǵan bul qujat memlekettiń jańartylǵan ınstıtýtsıonaldyq qurylymyn ǵana emes, sonymen qatar eldiń uzaq merzimdi damý baǵytyn aıqyndaıtyn negizgi qundylyq baǵdarlardy da bekitedi. Adam qadir-qasıetin qurmetteý, zań ústemdigi, ádilettilik, jaýapkershilik, qoǵamdyq kelisim, adamı kapıtaldy damytý jáne tehnologııalyq ózgeristerge ashyqtyq. Dál osy qundylyqtar júıesi Qazaqstannyń jańa saıası-quqyqtyq modeliniń berik negizin qalyptastyrmaq, — dep túıindedi sarapshy.
Eske sala keteıik, búgin jańa Konstıtýtsııa kúshine endi.
Prezıdent qazaqstandyqtardy Jańa Konstıtýtsııanyń kúshine enýimen quttyqtady.
