Jańa Konstıtýtsııa – kóne zamannan beri babalarymyzǵa baǵdar bolǵan dala zańdarynyń búgingi jalǵasy - Prezıdent
ASTANA. KAZINFORM – Aqordada Qazaqstan Respýblıkasynyń Konstıtýtsııasyn qabyldaýǵa arnalǵan saltanatty jıynnan soń sóılegen sózinde Memleket basshysy Qasym-Jomart Toqaev jańa Konstıtýtsııa – kóne zamannan beri babalarymyzǵa baǵdar bolǵan dala zańdarynyń búgingi jalǵasy, urpaqtar arasyndaǵy sabaqtastyq kórinisi ekenin aıtty, dep habarlaıdy Aqordanyń baspasóz qyzmeti.
-Biz Halyq Konstıtýtsııasyn keleshek urpaq aldyndaǵy jaýapkershiligimizdi tereń sezine otyryp qabyldadyq. Ata zań – qýatty, kúshti, básekege qabiletti Qazaqstannyń jańa Jarǵysy. Jańa Konstıtýtsııa – kóne zamannan beri babalarymyzǵa baǵdar bolǵan dala zańdarynyń búgingi jalǵasy, urpaqtar arasyndaǵy sabaqtastyq kórinisi. Zaman talabyna saı jańǵyrǵan bas qujat memlekettigimizdiń san ǵasyrlyq tarıhynan habar beredi,-dedi Memleket basshysy.
Sondaı-aq Predzıdent qazirgi Konstıtýtsııa naǵyz Ult zańy degen atqa laıyq ekenin atap ótti.
Onyń óne boıynda babalarymyz amanat etken eldik pen erlik rýhy, salt-dástúr, jasampazdyq jáne jańashyldyq uǵymdary toǵysqan.
Ata zań – memleket múddesiniń bolattaı berik qalqany. Konstıtýtsııamyzdyń eń basty maqsattary – jerimizdiń tutastyǵyn, elimizdiń Táýelsizdigi men egemendigin qorǵaýǵa, azamattarymyzdyń quqyqtary men bostandyqtaryn saqtaýǵa, qoǵamdyq ádilet pen zań ústemdigin nyǵaıtýǵa kepildik berý, sondaı-aq bilim, ǵylym, ınnovatsııa men mádenıetti damytý, tazalyqty dáriptep, tabıǵatty qorǵaýdy qamtamasyz etý.
Memleketimizdiń bas qujaty – halyq bolmysynyń myzǵymas nyshany, berekeli aýyzbirshiligimizdiń sımvoly.
- Azamattarymyz tańdaǵan jańa Konstıtýtsııa Qazaqstannyń jańa dáýirine jol ashady! Qazaqstan – aıaǵyna nyq turǵan, halyqaralyq bedeli bıik memleket. Elimiz ishki turaqtylyǵyn saqtap, ózge jurtpen dostyq qatynas ornatyp, zor senimmen alǵa qaraı qadam basyp keledi.
Endi memleketimiz damýdyń dańǵyl jolyna túsedi. Sondyqtan bizge tatýlyq pen dostyq, sabyrlyq pen tabandylyq, jasampazdyq pen uqyptylyq, eńbekqorlyq pen senimdilik aýadaı qajet.
Bizdiń bıik maqsattarymyz, naqty josparlarymyz bar. Kóp sozbaı bárimiz osy mindetterdi iske asyrýǵa kirisýimiz kerek,-dedi Qasym-Jomart Toqaev.
Osyǵan deıin Halyq Konstıtýtsııasy 1 shildeden bastap resmı túrde óz kúshine enetini týraly jazdyq.
