Jańa Konstıtýtsııa Qazaqstandaǵy kelisim men yntymaqtastyqty qamtamasyz etýdiń senimdi tiregine aınalady – Sergeı Ponomarev

ASTANA. KAZINFORM – QR Konstıtýtsııasynyń jańa jobasy – tutas, teńgerimdi ári jan-jaqty pysyqtalǵan qujat, sondyqtan ony jalpyhalyqtyq referendýmǵa shyǵarýǵa tolyq negiz bar. Bul týraly Konstıtýtsııalyq reformalar jónindegi komıssııanyń on ekinshi otyrysynda Májilis depýtaty Sergeı Ponomarev málimdedi.

Depýtattyń aıtýynsha, Ata zańǵa usynylǵan ózgerister qoǵamnyń búgingi suranysyna tikeleı jaýap beredi, ásirese azamattardyń memleketten kútetin teńdik pen erteńgi kúnge degen senimi basty nazarǵa alynǵan.

– Memleket basshysy atap ótkendeı, barlyq túzetýlerdiń túpki máni bir – ol adam men azamattyń quqyqtary men bostandyqtaryn qorǵaý. Jańa Konstıtýtsııa jobasy osy logıkamen qurylǵan, – dedi Sergeı Ponomarev.

Halyq qalaýlysy qujattyń bolashaq urpaq aldyndaǵy jaýapkershilikti de qamtıtynyn aıtty. Onyń ishinde qorshaǵan ortany saqtaý, turaqty ekonomıka men áleýmettik qaýipsizdik máseleleri ózara sabaqtasqan.

– Mańyzdy elementterdiń biri – azamattyq qoǵamnyń rólin kúsheıtý. Qoǵamdyq birlestikterdiń erkin qyzmeti men azamattardyń basqarý isine qatysý múmkindiginiń keńeıýi ashyq dıalogqa jol ashady. Al zań men sot aldyndaǵy báriniń teńdigi – ádiletti quqyqtyq tártiptiń negizi. Bul adamdardyń áleýmettik mártebesine nemese turǵylyqty jerine qaramastan, olardyń quqyqtarynyń birdeı qorǵalatynyn bildiredi, – dedi depýtat.

Sergeı Ponomarev kópultty qoǵamdaǵy birlik pen kelisim máselesine de toqtalyp ótti. Onyń paıymdaýynsha, jańa Konstıtýtsııa árbir adamnyń qadir-qasıetin qurmetteý arqyly turaqtylyqty nyǵaıta túspek.

– Jańa Konstıtýtsııa jobasy – halyqtyń úmitin arqalaǵan, memlekettiń adam quqyǵy, qaýipsizdik jáne áleýmettik sala úshin jaýapkershiligin aıqyndaıtyn qundy qujat, – dep túıindedi Májilis depýtaty.

Aıta keteıik, buǵan deıin «Aqjol» partııasy jańa Konstıtýtsııa jobasyna 50-den astam túzetý usynǵan edi.