Jańa Konstıtýtsııa Qazaqstan zańnamasyn jańǵyrtýdyń negizine aınalady – Ádilet mınıstri
ASTANA. KAZINFORM – Ádilet mınıstrliginiń Qoǵamdyq keńesiniń otyrysynda 1 shildede kúshine enetin jańa Konstıtýtsııa jáne jańa Quqyqtyq saıasat tujyrymdamasy jobasynyń negizgi erejeleri talqylandy.
Otyrys barysynda Ádilet mınıstri Erlan Sársembaev 15 naýryzda ótken respýblıkalyq referendýmda azamattar qoldaǵan jańa Konstıtýtsııa adam quqyqtary men bostandyqtarynyń basymdyǵyna, zań ústemdigi qaǵıdatyna jáne memlekettik basqarýdyń tıimdiligin arttyrýǵa negizdelgen memlekettik qurylystyń jańartylǵan modelin qalyptastyrǵanyn atap ótti.
– Ózderińiz biletindeı, Konstıtýtsııada alǵash ret zııatkerlik menshikti qorǵaý týraly norma bekitildi. Bul Konstıtýtsııanyń adam kapıtalyn damytýǵa aıryqsha mán beretinin kórsetedi. Óıtkeni adamı kapıtal bilimmen, ǵylymmen jáne ekonomıkamen tyǵyz baılanysty, – dep atap ótti mınıstr.
Sondaı-aq, mınıstr tsıfrlyq quqyqty damytýǵa qatysty birqatar másele sheshimin tabatynyn aıtty. Jańa Konstıtýtsııada tsıfrlyq ortadaǵy derbes derekterdi konstıtýtsııalyq deńgeıde qorǵaý bekitilgen.
Spıkerdiń sózinshe, bul jasandy ıntellekt, tsıfrlyq platformalar jáne tsıfrlyq aktıvter aınalymy máselelerin qosa alǵanda, tsıfrlyq qatynastardy quqyqtyq retteýdiń zamanaýı júıesin qalyptastyrýdy talap etedi.
– Bizdiń mindetimiz – elimizdi zamanaýı tsıfrlyq quqyqty damytý jónindegi óńirlik ortalyqtardyń birine aınaldyrý. Budan bólek, qylmystyq jáne ákimshilik saıasatty jetildirý de asa mańyzdy baǵyt bolyp sanalady. Konstıtýtsııada bekitilgen ádilettik qaǵıdaty jazanyń bultartpastyǵy, qoǵamdy qorǵaý, izgilik qaǵıdattary men adam quqyqtaryn saqtaý arasyndaǵy ornyqty tepe-teńdikti talap etedi. Sondyqtan zańnamany odan ári damytý ádilettik, teńgerim jáne quqyqbuzýshylyqtardyń aldyn alýǵa baǵyttaýǵa negizdeledi, – dep atap ótti Ádilet mınıstri.
Mınıstr konstıtýtsııalyq reformanyń qoldanystaǵy zańnamany keshendi jańartýǵa jáne jańa konstıtýtsııalyq qundylyqtar men qaǵıdattarǵa negizdelgen Quqyqtyq saıasat tujyrymdamasyn qabyldaýǵa baǵyttalǵanyn aıtty. Onyń aıtýynsha, bul qujat ulttyq quqyqtyq júıeni odan ári damytýdyń strategııalyq baǵyttaryn aıqyndaıdy.
Sondaı-aq otyrys barysynda konstıtýtsııalyq jańashyldyqtar, zańnamany jáne quqyq qoldaný praktıkasyn odan ári jetildirý máseleleri, sondaı-aq konstıtýtsııalyq reformany iske asyrýdyń aldaǵy kezeńderi talqylandy.
Eske sala ketsek, 1 shildeden bastap Qazaqstan Respýblıkasynyń jańa Konstıtýtsııasy kúshine enedi.
