Jańa Konstıtýtsııa halqymyzdy álemdik órkenıettiń jańa belesterine bastaıdy – Prezıdent
ASTANA. KAZINFORM – Jalpyhalyqtyq referendýmda qabyldanǵan Konstıtýtsııa – Qazaqstannyń aldaǵy ondaǵan jyldarǵa arnalǵan basty zańy. Dál osy Ata zań halqymyzdy álemdik órkenıettiń jańa belesterine bastaıdy. Bul pikirdi Memleket basshysy Qasym-Jomart Toqaev Astanada Memlekettik Tý kóterý rásiminde aıtty.
Prezıdenttiń aıtýynsha, tehnologııalyq jetistikter, saıası dúrbeleńder, áskerı qaqtyǵystar beleń alyp jatqan qazirgi dáýirde Ata zańymyzdyń jol nusqaýshy temirqazyq retindegi mańyzy eselene túsedi.
– Elimizdiń bas qujaty – Konstıtýtsııa 1 shildeden bastap kúshine enedi. Tamyz aıynda bir palataly Quryltaı saılaýy ótedi, al qyrkúıekte Qazaqstan Halyq Keńesi qurylady. Osylaısha, biz aýqymdy ózgerister kezeńine aıaq basamyz. Qazirdiń ózinde halqymyzdyń bolmysy, qundylyqtary, sana-sezimi, tipti, dúnıetanymy ózgerip jatyr. Azamattarymyzdyń basym kópshiligi zańǵa qurmetpen qaraý, qoǵamdyq tártipti nyǵaıtý strategııasyn qoldaıdy, sondaı-aq «Taza Qazaqstan» aktsııasyna belsene qatysady, – dedi Qasym-Jomart Toqaev.
Alaıda Memleket basshysy ár jetistikke máz bolyp, jaıbaraqat otyratyn zaman emestigin eske saldy.
Prezıent bıik maqsattarǵa umtylyp, tek qana alǵa – jarqyn bolashaqqa qaraı júrý keregin, keleshekke zor senimmen qarap, Qazaqstandy shyn máninde órkenıetti memleketke aınaldyrý qajettigin jetkizdi.
– Qazir biz bir el bolyp jasampazdyq jolyna tústik: qoǵamymyzda jańa ıdeıalar, jańa tulǵalar, otanshyl azamattardyń jańa býyny paıda bolýda. Men Memleket basshysy retinde osyndaı ıgi úrdisti qoldaımyn. Muny el ishinde jasalyp jatqan reformalardyń aıqyn kórinisi dep sanaımyn.
Halqymyzdyń aýyzbirshiligin nyǵaıtý basty maqsatymyz bolyp qala beredi. Bul – eldiń tabysty damýynyń birden-bir sharty, tıimdi ári uzaqmerzimdi faktory. Reformalardyń bastapqy kezeńinde elimizdegi kózi ashyq jáne progressıvti qoǵamdyq-saıası kúshter jalpyulttyq qundylyqtar men maqsattar aıasynda birigýi qajet dep sanaımyn. Sonda ǵana Ádiletti Qazaqstandy qurý, memlekettiligimizdi nyǵaıtý isinde tabysqa jete alamyz, – dedi Prezıdent.
Aıta keteıik, 4 maýsymda elimizde Memlekettik rámizder kúni atap ótiledi. Osydan 34 jyl buryn táýelsiz Qazaqstannyń óz Eltańbasy, Týy jáne Ánurany bekitildi.
Prezıdent bul kún – qazaq eliniń árbir azamaty úshin mańyzy erekshe mereke ekenin aıtty.
