Jańa Konstıtýtsııa el ekonomıkasyna qalaı áser etedi — sarapshy pikiri
ASTANA. KAZINFORM — Jańa Konstıtýtsııa Qazaqstan ekonomıkasyn ártaraptandyryp, ınvestıtsııa tartýǵa qolaıly orta qalyptastyrýǵa negiz qalaıdy. Bul týraly Ekonomıkalyq zertteýler ınstıtýtynyń Óńirlerdi damytý jáne ómir sapasy ortalyǵynyń dırektory Nurbolat Qurmetuly aıtty.
Nurbolat Qurmetulynyń aıtýynsha, jańa Konstıtýtsııanyń ekonomıkalyq turǵydan beretin basty nátıjeleriniń biri — bıznestiń bárine birdeı ortaq ári turaqty talaptarǵa negizdelgen ekonomıkalyq júıeniń qalyptasýy.
— Bıznes úshin, ásirese shaǵyn jáne orta kásipkerlikke salyq mólsherinen góri, oıyn erejesiniń turaqtylyǵy áldeqaıda mańyzdy. Konstıtýtsııada jekemenshik quqyǵy men ınvestorlardyń quqyqtarynyń qorǵalýy zańsyz ári negizsiz aralasýǵa jol bermeıtin quqyqtyq tetik bolady, — dedi Nurbolat Qurmetuly.
Sarapshynyń pikirinshe, jekemenshik pen ınvestıtsııanyń saqtalýyna beriletin kepildiktiń kúsheıýi bıznes ókilderiniń senimin arttyryp, Qazaqstannyń otandyq ári sheteldik ınvestorlar úshin múmkindikterin kúsheıtedi.
Nurbolat Qurmetuly Konstıtýtsııada jedel damıtyn qalalar úshin kózdelgen arnaıy quqyqtyq rejımge de erekshe toqtaldy.
— Mundaı aýmaqtarda quqyqtyq retteý tetikteri tıimdirek bolady, salyqtyq jáne kedendik jeńildikter qarastyrylady, ákimshilik rásimder jeńildetiledi. Bul jerlerde tsıfrlyq aglomeratsııalar, ınnovatsııalyq klasterler men tehnologııalyq startaptar qalyptasady, — dedi ol.
Sarapshy pikirinshe, jekelegen aýmaqtarda resýrstardy shoǵyrlandyryp, arnaıy jaǵdaı jasaý ınnovatsııalardyń jedel engizilýine jol ashady. Sonyń nátıjesinde ekonomıkanyń jańa ósý núkteleri qalyptasyp, onyń ıgiligi keıin kórshiles óńirlerge de taraıdy.
Budan bólek jańa Konstıtýtsııada adamı kapıtaldy damytýǵa erekshe mán berilgen.
— Jańa Konstıtýtsııada adam, onyń ómiri, quqyqtary men bostandyqtary memlekettiń eń joǵary qundylyǵy retinde aıqyndalǵan. Al bilim berý, ǵylym jáne ınnovatsııa eldiń strategııalyq basymdyqtary retinde belgilengen, — dedi Óńirlerdi damytý jáne ómir sapasy ortalyǵynyń dırektory.
Nurbolat Qurmetulynyń aıtýynsha, osy baǵyttardy júıeli túrde qoldaý eńbek ónimdiligin arttyrýǵa, zaman talabyna saı biliktilik pen daǵdylardy damytýǵa jáne uzaq merzimde ekonomıkanyń turaqtylyǵyn nyǵaıtýǵa múmkindik beredi.
Sarapshynyń aıtýynsha, iskerlik belsendiliktiń artýyna yqpal etetin mańyzdy tetikterdiń biri — sot júıesin odan ári jetildirý.
— Sot táýelsizdigin kúsheıtý, qarjylyq derbestigin qamtamasyz etý, sondaı-aq azamattardyń jaǵdaıyna keri áser tıgizetin zańdardyń qaıta kúshine enýine jol bermeý sııaqty sharalar bıznes júrgizýge ketetin shyǵyndy azaıtady, — dedi ol.
Sarapshynyń aıtýynsha, sot júıesine degen senimniń artýy uzaq merzimdi kelisimsharttardyń kóbirek jasalýyna, ınvestıtsııa tartýǵa jáne kásipkerlik belsendilikti kúsheıtedi
— 2026 jylǵy 1 shildeden bastap Qazaqstanda ekonomıkasy ártaraptandyrylǵan, ınnovatsııaǵa negizdelgen ári áleýmettik baǵyt ustanatyn jańa ekonomıkalyq úlginiń berik negizi qalanady. Mundaı júıede bastama kásipkerlik sýbektilerine beriledi, al memleket belgilengen talaptardyń saqtalýyna kepil bolady, — dep túıindedi Nurbolat Qurmetuly.
Aıta keteıik, buǵan deıin, CASPIA taldaý ortalyǵynyń dırektory Orhan Iolchýev 2026 jylǵy 1 shildeden bastap Qazaqstannyń jańa Konstıtýtsııasynyń kúshine enýi eldiń saıası damýyndaǵy jańa kezeńniń bastalǵanyn bildiretinin jáne memlekettik basqarý júıesiniń jańǵyrýyn kórsetetinin aıtqan edi.
