Jańa Konstıtýtsııa el damýynyń jańa kezeńine qadam basqanymyzdy aıshyqtaıdy – Málik Otarbaev
ORAL. KAZINFORM – Prezıdent keńesshisi Málik Otarbaev Batys Qazaqstan oblysyna jumys sapary barysynda óńirdiń birneshe aýdanynda bolyp, turǵyndarmen kezdesti.
Kaztalov aýdanynda elimizdegi saıası reformalar talqylanǵan jıyn barysynda Memleket basshysy Qasym-Jomart Toqaevtyń bastamasymen qolǵa alynǵan konstıtýtsııalyq reformalardyń mán-mańyzy keńinen túsindirildi. 15 naýryzda ótetin respýblıkalyq referendým arqyly el bolashaǵyna qatysty mańyzdy sheshim qabyldanatyny aıtyldy.
Kezdesý sońynda Málik Otarbaev sóz sóılep, elimizde qolǵa alynǵan konstıtýtsııalyq reformalardyń basty maqsaty – ádiletti, tıimdi ári halyq múddesine qyzmet etetin memleket qalyptastyrý ekenin atap ótti.
– Qazaqta «Zaman basqa, zań basqa» degen sóz bar. Jalpy zaman ózgergende, qoǵam ózgergende, adam ózgergende zańnyń ózgerýi qısyńdy nárse. Qazir elimizdiń saıası baǵdary úshin mańyzdy sát. Jańa Konstıtýtsııa — el damýynyń jańa kezeńine qadam basqanymyzdy aıshyqtaıtyn, kórsetetin tarıhı qujat. Jalpy, osy konstıtýtsııalyq reforma Prezıdenttiń elimizdegi saıası júıeni jańǵyrtý bastamasynan týyndaǵan mańyzdy qadam dep bilemiz. Bizdiń halqymyz, sapaly tirshilikke, sapaly ómir saltyna umtylyp otyr. Sondyqtan konstıtýtsııalyq reformanyń da bastaýynda halyqtyń suranysy tur. Halyqtyń suranysy ispen, dáıekti zańmen oryndalatyny sózsiz. Ekinshiden, Táýelsizdikten keıin 30 jyldan astam ýaqytty artqa tastaǵan qoǵam ıdeologııalyq baǵdar men tarıhı tanymda eleýli úzik baryn jıi aıtatyn. Biz áleýmettik jelidegi, buqaralyq aqparat quraldaryndaǵy aıtylatyn aşy, keıde tuşy syndy baıqaımyz. Minekeı, saıası jańarý osyny da oraıymen túzep, sabaqtastyqty jalǵap kele jatyr. Úshinshiden, zańnyń ózine zańdyq qaǵıdatpen qaraıtyn ýaqyt týdy. Biz – ilgeri memleketpiz. Bizdiń memlekettik tarıhymyz ǵasyrlar buryn bastalyp, ǵasyrlar boıy jalǵasyp otyrady, - dedi Prezıdent keńesshisi.
Málik Otarbaev sondaı-aq Aqjaıyq aýdanynyń ortalyǵynda bolyp, turǵyndarmen kezdesti.
– Búgingi kezdesýimizdiń negizgi maqsaty – jańa Konstıtýtsııa jobasynyń máni men mańyzyn uǵyndyrý. Ár zamannyń óz zańy bar. Oǵan tarıhtaǵy Esim hannyń eski joly, Qasym hannyń qasqa joly kýá. Bizdiń alǵashqy Konstıtýtsııamyz toqsanynshy jyldary Frantsııa eliniń zańyna uqsastyrylyp, túpnusqasy orys tilinde jasaldy. Búginde ol tolyqtaı ana tilimizde jazylyp, jańartyldy. Adam quqyǵy, memlekettik basqarý, tsıfrlyq keńistiktegi úderisterge saı ózgerister engizildi. Referendým arqyly árbir qazaqstandyq óz oıyn bildire alady. Biz reformaǵa baılanysty barlyq usynystardy eskerdik jáne olar Konstıtýtsııa jobasynda óz kórinisin tapty. Bul – elimizdiń damýyna jáne azamattyq qatysýdy keńeıtýge baǵyttalǵan mańyzdy qadam, – dedi Málik Nurjanuly.
Terektide Málik Otarbaevtyń qatysýymen aýdan aktıviniń jıyny ótkizildi.
Jıynda Prezıdent keńesshisi Málik Otarbaev sóz sóılep, referendýmnyń el ómirindegi mańyzyna toqtalyp, qatysýshylardyń suraqtaryna jaýap berdi.
Úsh aýdanda ótken kezdesýler barysynda qatysýshylar óz usynystary men oı-pikirlerin ortaǵa saldy. Olar Konstıtýtsııanyń jobasyn qoldaıtyndyqtaryn bildirip, turǵyndardy referendýmǵa qatysýǵa shaqyrdy.
Eske sala keteıik, budan buryn Oral qalasynda referendým kúni qoǵamdyq kólikter tegin júretinin jazǵan bolatynbyz.