Jańa Konstıtýtsııa boıynsha sóz erkindigi qandaı jaǵdaıda shekteledi — «Ádil sóz» basshysy
ASTANA. KAZINFORM — «Ádil sóz» sóz bostandyǵyn qorǵaý halyqaralyq qorynyń prezıdenti Qarlyǵash Jamanqulova Konstıtýtsııalyq reforma jónindegi komıssııanyń búgingi otyrysynda Ata zańnyń jańa nusqasy sóz erkindigin saqtaýǵa qanshalyqty kepil bola alatynyn aıtty.
— Sóz ben shyǵarmashylyq erkindigi — irgeli, tikeleı qoldanylatyn, adamnan ajyratylmaıtyn, ár adamǵa týǵannan tıesili quqyq. Jańa Konstıtýtsııanyń redaktsııasynda dál osy qaǵıdat bekitilip otyr. Sóz bostandyǵy azamattardyń ómirlik mańyzy bar sheshimderdi qabyldaý úshin obektıvti, tolyq ári shynaıy aqparatty ýaqtyly alýyna múmkindik beredi. Sonymen birge, memlekettiń júıeli qatelikterden qorǵaný qural-saımany dep sanaýǵa bolady. Basqasha aıtsaq, sóz bostandyǵy jýrnalısterdi qorǵaýdan buryn, Konstıtýtsııanyń jańa kirispesinde jarııa etilip, bekitilgen quqyq ústemdigin qamtamasyz etýdiń, Zań men tártip qaǵıdatyn saqtaýdyń protsedýralyq sharty bolyp otyr, — dedi ol.
Sarapshy Konstıtýtsııanyń jańa redaktsııasy sóz erkindigin qorǵaýmen birge shyǵarmashylyq erkindigin bekitetinin aıtty.
— Shyǵarmashylyq erkindigine beriletin kepildik zııatkerlik menshikti qorǵaý qaǵıdattarymen qanattasyp júrýi kerek. Bul tsıfrlyq dáýirde erekshe mańyzdy. Osymen birge jańa Konstıtýtsııada buǵan deıingisindegi sııaqty qoǵamdyq tártipti, Konstıtýtsııalyq qurylym negizderin, Qazaqstan Respýblıkasynyń tutastyǵyn qorǵaý jolynda sóz erkindigin ólshemdi sot shekteýge jol beriledi dep aıqyndalǵan, — dedi Qarlyǵash Jamanqulova.
«Ádil sóz» sóz qorynyń prezıdenti azamattardyń aqparatty alý jáne taratý quqyǵy da absolıýtti uǵym bolmaıtynyn atap ótti.
— Alaıda bul ózge adamdardyń quqyqtary men bedeline qoǵamdyq moral men qoǵamdyq tártipke qol suǵýǵa ákep soqpaýǵa tıis. Shekteýge QR Konstıtýtsııasynda jáne halyqaralyq quqyqta moıyndalǵan maqsattar úshin ǵana, dúdámal, ekiudaı túsindirýsiz ǵana jol beriledi. Tsenzýraǵa tyıym salynatynyn astyn syzyp atap ótkim keledi. Sóz ben shyǵarmashylyq erkindigi degen — oı erkindigi de. Bul ultymyzdyń jasampazdyq pen progreske degen umtylys áleýeti. Qoǵamdyq rýhanı-izgilik qundylyqtary týraly kóbińiz pikir bildirdińizder. Alaıda jaýapkershilik máselesi kóterilgen kezde quqyqtyq belgisizdikke jol joq ekenin túsiný kerek. Sondyqtan osy uǵym konstıtýtsııada bekise, oǵan qandaı uǵymdar kiretinin mindetti túrde zań deńgeıinde ashyp kórsetý kerek. Sondyqtan zańgerlerge osy uǵym tóńireginde taǵy bir márte oılanýdy usynamyn, — dedi ol.
Ótken aptada Konstıtýtsııalyq komıssııanyń alǵashqy otyrysy ótip, bir palataly «Quryltaıdyń» fýnktsııasy men quramy, vıtse-prezıdent laýazymynyń memlekettik bıliktegi orny, zań shyǵarý bastamasyn kóterýge haqyly «Halyq keńesiniń» quzyreti qandaı bolatyny aıtylǵan edi.