Jańa Konstıtýtsııa boıynsha referendým resmı túrde «ótti» dep tanyldy – komıssııa
ASTANA. KAZINFORM — QR Referendým jónindegi ortalyq komıssııasy respýblıkalyq referendýmdaǵy daýys berýdiń aldyn ala nátıjelerin jarııalady.
16 naýryzdaǵy tańǵy saǵat 8:00–degi jaǵdaı boıynsha, elimizdiń barlyq óńiri men sheteldegi 10 388 referendým ýchaskesinde daýystardy sanaý aıaqtaldy.
— Búgin tańerteń aýmaqtyq referendým komıssııalary daýys berý nátıjeleri týraly hattamalardyń elektrondy kóshirmelerin usyndy. Oblystardyń, Astana, Almaty, Shymkent qalalarynyń komıssııalarynan alynǵan osy derekterdiń negizinde Ortalyq referendým komıssııasy respýblıkalyq referendýmda daýys berýdiń aldyn ala nátıjelerin anyqtady, — dedi Ortalyq referendým komıssııasynyń tóraǵasy Nurlan Ábdirov.
Referendýmǵa qatysýǵa quqyǵy bar respýblıka azamattarynyń jalpy sany 12 mln 982 myń 603 adam. Daýys berýge qatysqan azamattardyń sany — 9 mln 127 myń 197 adamdy nemese referendýmǵa qatysýǵa quqyǵy bar azamattar sanynyń 73,12 paıyzyn qurady.
Osylaısha jańa Konstıtýtsııany qabyldaý týraly máseleniń oń sheshimin jaqtap, daýys bergen azamattar sany elimizdiń barlyq óńirinde daýys berýge qatysqan 7 mln 954 myń 667 adam nemese 87,15 paıyz boldy.
Referendýmǵa qoıylǵan máseleni qabyldamaǵan azamattar sany — 898 099 adam.
Jaýaptardyń eki nusqasy da tańdalǵan, ıaǵnı jaramdy dep tanylǵan, biraq daýystardy sanaý kezinde esepke alynbaıtyn bıýlletender sany — 127 868.
Belgilengen úlgidegi sondaı aq daýys bergenderdiń erik bildirýin aıqyndaý múmkin emes jáne jaramsyz dep tanylǵan bıýlletender sany — 146 558.
— Respýblıkalyq referendým týraly zańnamanyń normalaryna sáıkes, eger referendýmǵa qatysý quqyǵy bar azamattardyń jartysynan kóbi daýys berýge qatysqan bolsa, referendým ótkizilgen dep sanalady, — dep atap ótti Nurlan Ábdirov.
Sondaı-aq, respýblıkalyq referendýmǵa shyǵarylǵan másele boıynsha sheshim eger ony jaqtap, oblystardyń, respýblıkalyq mańyzy bar qalalardyń jáne astananyń keminde úshten ekisinde daýys berýge qatysqan azamattardyń jartysynan astamy jaqtap daýys berse, «qabyldandy» dep esepteledi.
Respýblıkalyq referendým zańnamasyna sáıkes, aýmaqtyq referendým komıssııalary daýystar sanalǵannan keıin árbir óńir boıynsha hattamalardyń túpnusqalaryn Ortalyq referendým komıssııasyna tabystaýy qajet.
Respýblıkalyq referendýmnyń qorytyndylary Ortalyq referendým komıssııasynda belgilenedi. Onyń ótetin kúni men ýaqyty qosymsha habarlanady.
Óńirler bólinisinde jańa Konstıtýtsııa jobasyn jaqtap daýys bergender:
1. Abaı oblysy boıynsha – 84,02%
2. Aqmola oblysy boıynsha – 85,64%
3. Aqtóbe oblysy boıynsha – 93,96%
4. Almaty oblysy boıynsha – 80,41%
5. Atyraý oblysy boıynsha – 78,81%
6. Batys Qazaqstan oblysy boıynsha – 81,41%
7. Jambyl oblysy boıynsha – 92,73%
8. Jetisý oblysy boıynsha – 90,15%
9. Qaraǵandy oblysy boıynsha – 83,82%
10. Qostanaı oblysy boıynsha – 89,74%
11. Qyzylorda oblysy boıynsha – 89,97%
12. Mańǵystaý oblysy boıynsha – 93,40%
13. Pavlodar oblysy boıynsha – 94,14%
14. Soltústik Qazaqstan oblysy boıynsha – 83,10%
15. Túrkistan oblysy boıynsha – 92,21%
16. Ulytaý oblysy boıynsha – 83,73%
17. Shyǵys Qazaqstan oblysy boıynsha – 91,51%
18. Astana qalasy boıynsha – 86,32%
19. Almaty qalasy boıynsha – 71,36%
20. Shymkent qalasy boıynsha – 86,88%.
