Jańa Konstıtýtsııa boıynsha referendým: qazaqstandyqtar Qyrǵyzstanda daýys berip jatyr
BІShKEK. KAZINFORM – Bishkekte Qazaqstannyń Qyrǵyz Respýblıkasyndaǵy elshiliginde jańa Konstıtýtsııa boıynsha jalpyulttyq referendýmda daýys berý júrip jatyr, dep habarlaıdy Kazinform agenttiginiń Bishkektegi menshikti tilshisi.
Dıplomatııalyq ókildik ǵımaratynda ornalasqan referendýmnyń №428 ýchaskelik komıssııasy jumysyn jergilikti ýaqyt boıynsha tańǵy saǵat 7:00-de bastady.
Elshiliktiń málimetinshe, saılaýshylar tizimine Qyrǵyzstanda turatyn jáne jeke, qyzmet, bilim alý, iskerlik jáne týrıstik maqsattarmen kelgen 300 qazaqstandyq kirdi. Olardyń kópshiligi konsýldyq esepte tur.
- Belsendi ómirlik pozıtsııany ustanyp, daýys berýge únemi qatysamyn. Elimiz árkim óz pikirin bildire alǵan kezde ǵana gúldenedi dep sanaımyn. Elshilik otandastaryn kez kelgen másele boıynsha jyly qarsy alatynyna óte qýantady. Búgin mol dastarhan jaıylyp, dámdi shaı berilip otyr, - dedi qazaqstandyq Dmıtrıı Anatolenko.
Bishkekte shamamen jeti jyl turyp júrgen kásipker Baqyt Sydyqov ta daýys berý protsesine belsendi qatysyp otyr.
- Sońǵy úsh saılaý naýqan boıy Qazaqstannyń Qyrǵyzstandaǵy elshiligine kelip júrmin. Búgin men Almatydan kelgen áriptesterimmen birge referendýmda daýys berýge keldim. Qazaqstannyń ár azamaty jańa Konstıtýtsııa boıynsha óz erkin bildirýi qajet jáne mańyzdy, sebebi bul – memlekettiń negizgi zańy, - dep sanaıdy ol.
Bogdan Panasıýk áıelimen birge Qyrǵyzstanǵa týrızm maqsatynda kelip, osy mańyzdy ulttyq sharany jiberip almaýdy sheshti.
- Men elimizdiń Bishkektegi elshiliginde ótken referendýmda daýys berýge qatystym. Konstıtýtsııa – respýblıkamyzdyń barlyq keıingi zańdaryna negiz bolatyn mańyzdy qujat, sondyqtan men úshin bul másele boıynsha pikir bildirý mańyzdy boldy, - dep túsindirdi ol.
Otandasymyz Tatıana Kasınovanyń aıtýynsha, jańa Konstıtýtsııa boıynsha referendýmǵa qatysý óte mańyzdy boldy.
- Men árkimniń daýysy óte mańyzdy dep sanaımyn, - dep qysqasha atap ótti ol.
Referendýmnyń ýchaskelik komıssııasynyń quramynda TMD Parlamentaralyq Assambleıasynyń halyqaralyq baqylaýshysy BAQ ókilderi bar, olar úshin arnaıy oryndar bólindi. Daýys berý jergilikti ýaqyt boıynsha keshki saǵat 8:00-ge deıin jalǵasady, sodan keıin ýchaskelik komıssııa músheleri daýystardy sanaı bastaıdy.
Aıta ketelik, álemniń 40-tan astam elinde referendým ýchaskeleri jumys istep jatyr.
Osyǵan deıin Túrkııada qazaqstandyqtar referendýmǵa qatysyp jatqanyn jazdyq.
