Jańa Konstıtýtsııa – bolashaq urpaqqa arnalǵan berik qalqan – Samat Nurtaza

ASTANA. KAZINFORM — Álemdegi dúrbeleńder men syn-qaterler jaǵdaıynda memleketti qorǵap qalatyn basty tetik – Konstıtýtsııa. Al onyń ózeginde adam resýrsy turýy tıis. Bul týraly QR Parlamenti Májilisiniń depýtaty, Konstıtýtsııalyq reforma jónindegi komıssııa múshesi Samat Nurtaza aıtty.

– Bizdiń eń basty qundylyǵymyz – adam resýrsy. Shyndyǵyn aıtqanda, búgingi álemde bolyp jatqan túrli dúrbeleńder men syn-qaterlerdiń saldary sezile bastaǵanda, dál osy Konstıtýtsııa memleketti qorǵap qalatyn tetik bolady dep esepteımin, - deıdi májilismen.

Depýtat Konstıtýtsııalyq reformany ázirleý úderisine qoǵam ókilderiniń keńinen tartylǵanyna nazar aýdardy.

– Mysal retinde aıtar bolsam, 1995 jylǵy Konstıtýtsııany bar-joǵy 12 adam aqyldasyp qabyldaǵan edi, onyń úsheýi shetel azamaty boldy. Al qazir Konstıtýtsııalyq reforma jónindegi komıssııa quramynda 130 Qazaqstan azamaty bar. Olardyń qatarynda dárigerler, muǵalimder, zańgerler jáne qoǵamnyń ártúrli salasynyń ókilderi otyr. Sondyqtan bul Konstıtýtsııa tek búginimizge emes, bolashaq urpaqtyń da máselelerine tótep beretin berik qalqan bolady dep oılaımyn, - deıdi spıker.

Samat Nurtaza qoǵam tarapynan ártúrli pikirdiń bolýy qalypty jaǵdaı ekenin aıtty.

– Mundaı mańyzdy másele boıynsha qoǵamnyń óz pikirin bildirýi zańdy. Bizge de túrli ýájder kelip jatyr, qoldap, aqyl-keńes aıtyp jatqandar da bar. Qoǵamda 100 paıyz birdeı oılaıtyn kózqaras bolmaıtyny túsinikti. Árıne, referendýmda qoǵam túgeldeı qoldaıdy dep kútip otyrǵan joqpyz. Biraq sanaly qoǵam bul Konstıtýtsııanyń mánin, onyń túpki paıdasyn túsinedi dep senemin. Eger qoǵam osy Konstıtýtsııany qoldasa, aldaǵy ýaqytta jaqsy kúnderge jetetinimizge senemin, - deıdi ol.

Depýtat ǵylym, bilim jáne ınnovatsııa salasyna qatysty da kózqarasyn bildirdi.

– Ǵylym, bilim jáne ınnovatsııa – eń aldymen adam úshin qajet. Biz jastardyń shetelge birjola ketpeı, Qazaqstanda qalyp, tipti shetelde bilim alsa da elge oralyp, memleketke paıdasyn tıgizgenin qalaımyz. Qoǵam osylaı damysa, barlyq sala da alǵa jyljıdy. Ol úshin adamǵa jaǵdaı jasaý qajet. Sondyqtan men bul Konstıtýtsııany adamdy súıetin Konstıtýtsııa dep esepteımin. Qazirgi tańda bul salaǵa jetkilikti kóńil bólinip jatyr. Onyń basy-qasynda Saıasat Nurbek myrza júr. Árıne, bári minsiz dep aıtýǵa bolmaıdy. Alaıda sheteldik ýnıversıtetterdiń fılıaldary ashylyp jatyr, shalǵaı aýyldaǵy árbir balanyń bilim alýǵa múmkindigi bolýy tıis. Tehnologııalyq progress zamanynda biz artta qalmaýymyz kerek, - dedi komıssııa múshesi.

Aıta keteıik, buǵan deıin QR Parlamenti Májilisiniń depýtaty Erlan Saırov memlekettik til týraly pikir bildirgen edi.