Jańa Konstıtýtsııa bilim berý salasyna jańa mindetter júkteıdi – mınıstr
ASTANA. KAZINFORM – Jańa Konstıtýtsııa adam kapıtalyn, bilim, ǵylym men ınnovatsııany damytýdy memlekettiń strategııalyq basymdyǵy retinde aıqyndady. Bul týraly Oqý-aǵartý mınıstri Juldyz Súleımenova Astanada ótip jatqan Tamyz konferentsııasynda aıtty.
Mınıstr bıylǵy oqý jyly elimiz úshin mańyzdy tarıhı kezeńde bastalǵaly turǵanyn atap ótti. Kúshine engen jańa Konstıtýtsııa adam kapıtalyn, bilim, ǵylym men ınnovatsııany damytýdy memlekettiń strategııalyq basymdyǵy retinde aıqyndady.
– Onyń ózeginde adam, onyń quqyǵy men jaýapkershiligi, zań jáne tártip, adal eńbek jáne el bolashaǵyna jaýapkershilik tur. Osy qaǵıdattardy balalarymyzdyń kúndelikti ómir mádenıetine aınaldyrý – bilim júıesiniń basty mindeti. Biz tereń bilimdi, eńbekqor, zańǵa baǵynatyn, memleket pen qoǵam aldyndaǵy jaýapkershilikti tereń sezinetin azamat tárbıeleýge tıispiz, – dedi J. Súleımenova.
Prezıdent qoldaýymen júzege asyrylǵan irgeli reformalardyń arqasynda bilim salasynda sheshimin tapqan naqty ári keshendi nátıjeler elimizdegi adam kapıtalynyń damýyna negiz bolýda.
– Qala men aýyl mektepteri arasyndaǵy alshaqtyqty azaıtýǵa arnalǵan «Keleshek mektepteri» ulttyq jobasy júzege asyryldy, bilim sapasy artyp keledi, pedagogterdy qoldaý jáne ınklıýzııany damytý jumystary jalǵasýda. TALIS halyqaralyq zertteýiniń qorytyndylaryna sáıkes pedagogıkalyq kontıngent búginde joǵary nátıjelerge qol jetkizýde. Sondyqtan da eń aldymen, bilim salasyna kórsetip kele jatqan qoldaýyńyz úshin, ustazdarymyz ben oqýshylarymyzǵa degen zor qamqorlyǵyńyz úshin, ustazdar qaýymdastyǵy atynan shynaıy rızashylyǵymyzdy bildiremiz, – dedi Oqý-aǵartý mınıstri.
Aıta keteıik, elordada Prezıdent Qasym-Jomart Toqaevtyń qatysýymen pedagogterdiń Tamyz konferentsııasynyń plenarlyq otyrysy bastaldy.
Oǵan elimizdiń barlyq óńirinen 600-den astam bilim salasynyń qyzmetkerleri men eńbek ardagerleri qatysyp otyr.
