Jańa Konstıtýtsııa: baspana ıeleri men jalǵa alýshylar úshin qandaı ózgeris bar
ASTANA. KAZINFORM — Bıylǵy 1 shildeden bastap kúshine engen jańa Konstıtýtsııa turǵyn úı men jeke menshik quqyǵyn qorǵaýdy kúsheıtetin normalardy bekitti. Endi eshkimdi baspanasynan shyǵarý nemese múlkin tartyp alý sottyń sheshiminsiz júzege aspaıdy.
Bul norma tek páter ıelerine emes, turǵyn úıdi zańdy túrde paıdalanyp júrgen adamdarǵa, sonyń ishinde jalǵa alýshylarǵa da qatysty.
Jyljymaıtyn múlik naryǵynyń sarapshysy Vıtalıı Shalaevtyń aıtýynsha, bul ózgeris jalǵa berý naryǵyn túbegeıli ózgertpeıdi, biraq taraptardy jaýapkershilikpen áreket etýge yntalandyrady.
— Menińshe, bul túzetý jalǵa berý naryǵyn ózgertýden buryn, ony jańa deńgeıge kóteredi. Budan bylaı aýyzsha kelisimge emes, zań talaptaryna saı jasalǵan shartqa súıengen durys. Páter ıesi de, jalǵa alýshy da óz mindetin oryndasa, bul ózgeris olarǵa qosymsha qıyndyq týǵyzbaıdy, — dedi sarapshy.
Onyń aıtýynsha, endi jalǵa berý shartyn muqııat ázirleýdiń mańyzy arta túsedi.
— Qazirdiń ózinde kóp adam daıyn úlgidegi kelisimshartty paıdalanady nemese múlde aýyzsha kelisip jatady. Mundaı tásildiń táýekeli joǵary. Kelisimshartta eki taraptyń quqyqtary men mindetteri, kelisimdi buzý tártibi jáne páterdi bosatý sharttary naqty jazylsa, keıin daý týyndaý yqtımaldyǵy da azaıady, — deıdi ol.
Sonymen qatar sarapshy jańa normany is júzinde qoldanýǵa qatysty áli de jaýapsyz suraqtar bar ekenin aıtady. «Mysaly, jalǵa alýshy kelisimshart talaptaryn buzsa, biraq páterden óz erkimen shyqpasa, ne bolady?»
— Aıtalyq, kelisimshartta jaldaý aqysyn uzaq ýaqyt tólemese nemese basqa da eleýli talaptardy buzsa, jalǵa alýshy páterdi bosatýǵa mindetti dep kórsetilgen, biraq ol buǵan kelispese, kelisimsharttaǵy talap jetkilikti bola ma, álde menshik ıesine báribir sotqa júginýge týra kele me? Bul suraqtyń naqty jaýaby ázirge joq. Ony aldaǵy sot tájirıbesi kórsetedi, — dedi Vıtalıı Shalaev.
Onyń pikirinshe, bul ózgerister jalǵa berý naryǵyn ashyq ári quqyqtyq turǵydan rettelgen júıege aınaldyrýǵa yqpal etedi.
— Bul túzetý kelisimsharttyń mańyzyn odan ári arttyrady. Ýaqyt óte kele naryq aýyzsha kelisimnen zań talaptaryna saı rásimdelgen mámilelerge kóshedi. Bul páter ıesine de, jalǵa alýshyǵa da tıimdi, — dedi sarapshy.
Vıtalıı Shalaevtyń sózinshe, jańa norma tek jalǵa berý salasyna ǵana qatysty emes. Ol jyljymaıtyn múlik ıeleriniń quqyqtaryn da kúsheıtedi.
— Konstıtýtsııada endi adamnyń múlkin sot sheshiminsiz tartyp alýǵa bolmaıtyny naqty jazylǵan. Bul — adal menshik ıeleriniń quqyǵyn qorǵaýǵa berilgen qosymsha kepildik, — dep túıindedi sarapshy.
Buǵan deıin Qazaqstanda múlik satqanda túsetin tabysqa salyq esepteý tártibi ózgergeni jóninde jazdyq.
