Jańa Konstıtýtsııa: Bas prokýratýra 18-bapty naqtylaýdy usyndy

ASTANA. KAZINFORM – QR Bas prokýrorynyń orynbasary Jandos Ómirálıev Konstıtýtsııalyq reforma jónindegi komıssııanyń 8-shi otyrysynda jańa Konstıtýtsııa jobasyndaǵy 18-bapty orys tilinde naqtylaı túsýdi usyndy.

Onyń aıtýynsha, komıssııanyń qaraýyna Konstıtýtsııa jobasynyń 18-babyna qatysty birqatar usynys kelip túsken. Zańgerler men mamandardyń pikirinshe, zań tehnıkasy turǵysynan suraqtar bar.

– Osy baptyń 2-tarmaǵynda «Sot sheshiminsiz adamdy zańda kózdelgen merzimnen artyq ustaýǵa bolmaıdy» dep kórsetilgen. Bul jalpy durys. Degenmen, orys tilindegi aýdarmasynda «merzimnen artyq ustaý» degen sheshýshi uǵym kórsetilmeı qalǵan, - dedi Bas prokýrordyń orynbasary.

Sol sebepti keıbir mamandar «sot sheshiminsiz kúdiktini ustaýǵa múldem bolmaıdy» dep túsiný qaýpi bar ekenin aıtyp jatyr.

– Mátin mazmunyna qarasaq, rasynda da dál solaı. Kisi óltirý, basqa da qoǵamǵa qaýipti qylmystar kidiristi kótermeıtini anyq. Qylmysty toqtatý, kúdiktini dereý oqshaýlaý — quqyq qorǵaý qyzmetiniń eń negizgi mindetteriniń biri. Tek osydan keıin ǵana sot ony kúzetpen ustaý týraly sheshimdi qabyldaıdy. Bul dúnıejúzilik tájirıbe sanalady. Konstıtýtsııanyń árbir normasy anyq, túsinikti bolýy kerek. Sondyqtan talqylaýdaǵy osy normany zań tehnıkasy turǵysynan qaıta qarap, naqtylaýdy usynamyn, – dedi Jandos Ómirálıev.

Sonymen birge, ol komıssııanyń orasan zor jumys atqaryp jatqanyn erekshe atap ótti.

– Eń mańyzdysy, Ata zańnyń jobasyn talqylaý halyqtan alshaq emes, onymen birge talqylanyp jatyr. Onyń ár normasy eldiń búgingi turaqtylyǵy men erteńgi ıgiligine baǵyttalǵan, – deıdi Bas prokýror orynbasary.

Aıta keteıik, elordada Konstıtýtsııalyq reforma jónindegi komıssııanyń 8-shi otyrysy bastaldy.