Jańa Konstıtýtsııa: Adam kapıtaly men ulttyq qaýipsizdik basty orynda

ASTANA. KAZINFORM – Elimizdegi Konstıtýtsııadaǵy ózgerister memleket pen qoǵam arasyndaǵy jańa deńgeıdegi suhbattastyq alańy bolmaq. Bul týraly Konstıtýtsııalyq reforma jónindegi komıssııa múshesi Dıhan Qamzabekuly «Jibek Joly» telearnasynyń «Live» baǵdarlamasynda egjeı-tegjeıli túsindirip berdi.

Komıssııa múshesi atap ótkendeı, qazirgi tańda reformanyń mán-jaıyn halyqqa jetkizý jáne túsindirý jumystary birinshi kezekte tur. Bul maqsatta túrli partııa jetekshileri men qoǵamdyq uıymdardan jumyldyrylǵan arnaıy koalıtsııa qurylǵan.

– Bul koalıtsııa bizdiń Qazaqstannyń búgingi únin jetkizetin, halyqtyń únin belgili deńgeıde jańa bir sapaǵa kóteretin alań bolǵaly tur. Óńirlerde, úlken mekemelerde kezdesýler ótkizilip, qoǵam tarapynan qoıylǵan kez kelgen saýalǵa naqty, tushymdy jaýap berilýi tıis, – dedi Dıhan Qamzabekuly.

Reforma aıasynda tek saıası qurylym emes, sonymen qatar ulttyq biregeılikti saqtaý máseleleri de nazardan tys qalmaǵan. Spıkerdiń aıtýynsha, komıssııa jumysynda árbir baptyń zańdyq qana emes, fılologııalyq turǵydan da dáldigine basa mán berilgen.

– Otbasy máselesi memlekettiń negizi retinde mádenı qundylyqtar deńgeıinde qarastyrylady. Sondaı-aq memlekettik tildiń mártebesi men qoldanylý aıasy júıelengen. Sonymen qatar eń kóp kóterilgen máselelerdiń ishinde zaıyrlylyq máselesi de bar, – deıdi ol. 

Jańa zamannyń syn-qaterlerine baılanysty Konstıtýtsııa jobasynda adam quqyqtaryn qorǵaýdyń jańa tetikteri paıda boldy. Tehnologııa damyǵan tusta azamattardyń jeke ómirine qol suqpaý máselesi Preambýla deńgeıinde kórinis tapqan.

– Tsıfrlyq tehnologııalardyń damýymen birge jaǵymsyz qubylystar da enip ketti. Jeke iske qol suǵý, banktik shottardaǵy alaıaqtyq áreketter sııaqty máselelerden qorǵaýdyń zańdyq tetikteri qarastyryldy. Ata zańnyń negizgi múddesi – 35 jyldyq táýelsizdik belesinde adam quqyǵyna qaıta múmkindik berý, – dep túıindedi spıker.

Aıta keteıik, Ortalyq referendým komıssııasy azamattardy 2026 jylǵy 15 naýryzda ótetin daýys berýge belsendi qatysýǵa shaqyrady.