Jańa konkýrstyq júıeniń engizilýine baılanysty memlekettik qyzmetke kandıdattardy irikteý eki kezeńmen júzege asatyn bolady - Q. Nurpeıisov
ASTANA. 14 maýsym. QazAqparat /Qanat Mámetqazyuly/ - Jańa konkýrstyq júıeniń engizilýine baılanysty memlekettik qyzmetke kandıdattardy irikteý eki kezeńmen júzege asady.
Búgin QR Prezıdenti janyndaǵy Memlekettik basqarý akademııasynda ótip jatqan «Memlekettik qyzmettiń qazaqstandyq úlgisi: mindetteri men damý keleshegi» atty ǵylymı-praktıkalyq konferentsııa barysynda jańa jobaǵa qatysty baıandaǵan QR Memlekettik qyzmet isteri agenttiginiń tóraǵasy Qaırat Nurpeıisov osylaı málim etti.
«Birinshi kezeńde irikteý memlekettik qyzmetke kelgisi keletin azamattar úshin agenttik pen onyń aýmaqtyq bólimshelerinde barlyǵyna ortaq biryńǵaı testileý úlgisinde ótetin bolady. Bul testileýden sátti ótken kandıdat memlekettik qyzmetshilerdiń kadrlyq rezervine ótedi. Al ekinshi kezeń barysynda memlekettik organdar tek qana birinshi kezeńdik testileý nátıjesimen kadrlyq rezervke ótken tulǵalar arasynan ǵana memlekettik qyzmetkerge laıyqty tulǵany iriktep alady», - dedi Q. Nurpeıisov.
Onyń aıtýynsha, búgingi kúni Memlekettik qyzmet isteri agenttigi eki kezeńdi konkýrstyq irikteý boıynsha elimizdiń Aqmola jáne Ońtústik Qazaqstan oblystarynda ilki jobany júzege asyrýda. «Osy ilki jobalardyń nátıjeleri sáıkesinshe normatıvtik zań shyǵarý jumystary barysynda tıimdiligin kórsetetin bolady. Bundaı konkýrstyq júıeni engizýdiń mańyzy zor dep oılaımyz», - dedi agenttik tóraǵasy.
