Jańa kollektorlar men aryqtar: Almaty sý basý máselesin qalaı sheship jatyr

ALMATY. KAZINFORM – Jıi ári tolassyz jaýǵan jańbyr saldarynan megapolıs kósheleri men aýlalardy sý basady. Almaty ákimdigi bul máselemen qalaı kúresip jatyr. Kazinform agenttiginiń tilshisi anyqtap kórdi.

Almaty qalalyq ekologııa jáne qorshaǵan ortany qorǵaý basqarmasynyń málimetinshe, barlyǵy 56 ýchaske bar. Olardy azdaǵan jaýyn-shashyn kezinde únemi sý basyp qalady. Byltyr megapolıste 37,5 shaqyrym aryq pen nóser kárizi jóndeldi. Qalanyń ortalyq jáne shyǵys bóligindegi jumystar bıyl da jalǵasady.

— 2022-2023 jyldary tótenshe jaǵdaılardy joıý sharalary aıasynda turaqty sý basatyn 102 aýmaq anyqtaldy. Onyń 56-sy asa qaýipti. Jumys barysynda jalpy uzyndyǵy 11,8 shaqyrym boltyn 13 kollektor qalpyna keltirildi, uzyndyǵy 7,1 shaqyrym 6 qosymsha kollektorlar salyndy. Budan bólek, 9,4 shaqyrym úsh sý burý kanaly jóndeldi, jalpy uzyndyǵy 6,6 km 6 jańa kanal salyndy. Sonymen qatar 6,8 shaqyrym jańa sýarý aryq jelisi salyndy, — dep jaýap berdi Kazinform agenttiginiń saýalyna basqarmadan.

Ákimdiktiń baspasóz qyzmeti ótken jyly Almatynyń shyǵys bóliginde 15 kóshede jalpy uzyndyǵy 7,4 shaqyrym aryq jelisi qaıta jóndeýden ótkenin naqtylady.

Qalanyń ortalyq bóliginde 67 kóshede jalpy uzyndyǵy 30,1 km aryqpen pen nóser kárizi jańartylsa, batys bóliginde — Alataý, Naýryzbaı, Áýezov aýdandarynda 20,5 shaqyrym jańa aryq jelisi salyndy.

— Bul sharalar gıdrologııalyq jaǵdaıdy jaqsartýǵa baǵyttalǵan, ásirese sý basý qaýpi joǵary aımaqtarda, — dep atap ótti ákimdikten.

Osyǵan deıin Almatyda qurylys kompanııalary nóser kárizderin salýǵa mindetteletini týraly jazǵan edik. 

Budan bólek, úıden shyǵatyn qoqystardy beıbereket tastaı beretinder jaýapqa tartylatynyn jazǵanbyz. 

Sondaı-aq megapolıste aryq jelilerinen 640 tonna qoqys shyǵaryldy.