Jańa Kólik mınıstri Nurlan Saýranbaev ant qabyldady

ASTANA. KAZINFORM – Kólik mınıstri Nurlan Saýranbaev Úkimet úıinde ant berdi.

- Qazaqstan halqy men Prezıdenti aldynda óz Otanym — Qazaqstannyń ekonomıkalyq jáne rýhanı damý isine barlyq kúsh-jigerim men bilimimdi jumsaýǵa, memlekettiń Konstıtýtsııasy men zańdaryn qatań saqtaýǵa, ózimniń barlyq is-áreketimde zańdylyq pen ádilettilik, azamattyq, ultaralyq jáne konfessııaaralyq tatýlyq prıntsıpterin ustanýǵa, Qazaqstan halqyna adal qyzmet etýge, óz elimniń memlekettiligi men dúnıejúzilik qoǵamdastyqtaǵy bedelin nyǵaıta berýge saltanatty túrde ant etemin, - dep ant berdi Nurlan Saýranbaev Úkimet otyrysynyń aldynda.

Aıta keteıik, 30 maýsymda Memleket basshysynyń Jarlyǵymen Nurlan Saýranbaev Kólik mınıstri laýazymyna taǵaıyndaldy.